ក្រុមហ៊ុនឡានដ៏ធំ BMW បានប្រកាសពីប្ដេជ្ញាចិត្តរបស់ខ្លួនក្នុងបន្តគម្រោងសាងសង់រោងចក្រផលិតឡានលើទឹកដីម៉ិកស៊ិក ផ្គើនការព្រមានរបស់ប្រធានាធិបតីជាប់ឆ្នោត ដូណាល់ ត្រាំ ដែលគំរាមដាក់ពិន័យក្រុមហ៊ុនណា មិនព្រមរើរោងចក្រមកសាងសង់ក្នុងទឹកដីអាមេរិកវិញនោះ។ ដោយសារគំរាមនេះ ក្រុមហ៊ុនធំៗជាច្រើន បានសម្រេចចិត្តលុបចោលគម្រោងសាងសង់រោងចក្រនៅឯបរទេស ជាពិសេសនៅលើទឹកដីម៉ិកស៊ិកតែម្ដង។
នាយកផ្នែកលក់ និងទីផ្សាររបស់ក្រុមហ៊ុនឡាន BMW លោក Ian Robertson បានប្រាប់សារព័ត៌មានអង់គ្លេស BBC ថា ក្រុមហ៊ុនលោក មានការប្ដេជ្ញាចិត្តខ្លាំងក្នុងការសាងសង់រោងចក្រដំឡើងឡាននៅ San Luis Potosi របស់ម៉ិកស៊ិក ដែលទទួលខុសត្រូវក្នុងការផលិតឡានចំនួន៣ស៊េរីសម្រាប់លក់នៅក្នុងទីផ្សារអាមេរិកខាងជើង។ ការប្រកាសនេះ គឺផ្ទុយពីការណែនាំរបស់ប្រធានាធិបតីជាប់ឆ្នោត ដូណាល់ ត្រាំ ដែលទាមទារឲ្យក្រុមហ៊ុនទាំងអស់ ងាកមកប្រកបរបររកស៊ីលើទឹកដីអាមេរិកវិញ។
ក្នុងគោលដៅបង្កើនការងារសម្រាប់ប្រជាជនអាមេរិកឡើងវិញ លោក ត្រាំ បានទាមទារឲ្យក្រុមហ៊ុនទាំងឡាយ ដែលមានរោងចក្រនៅបរទេស ត្រូវសាងសង់រោងចក្រនៅអាមេរិកវិញ បើមិនចង់រងការដាក់ពន្ធនាំចូលដ៏ខ្ពស់ទេនោះ។ ខណៈដែលក្រុមហ៊ុន BMW បន្តគម្រោងសាងសង់រោងចក្រនៅម៉ិកស៊ិកនោះ ក្រុមហ៊ុនជាច្រើនចាប់ផ្ដើមដកខ្លួន ឬលុបចោលគម្រោងសាងសង់រោងចក្ររបស់ខ្លួនជាបន្តបន្ទាប់។
កាលពីសប្ដាហ៍មុន ក្រុមហ៊ុនឡាន FORD បានសម្រេចចិត្តលុបចោលគម្រោងរោងចក្រតម្លៃ១,៦ពាន់លានដុល្លារពីម៉ិកស៊ិក និងសាងសង់នៅរដ្ឋ Michigan ជំនួសវិញ។ ដោយឡែកក្រុមហ៊ុនឡាន Fiat Chrysler Automobiles ក៏ប្រកាសពីគម្រោងរោងចក្រនៅរដ្ឋ Michigan ដើម្បីផលិតឡានប្រភេទ SUV និងប្រភេទឡានធំ ដែលសព្វថ្ងៃនេះ កំពុងត្រូវបានផលិតនៅឯម៉ិកស៊ិក។ នៅសប្ដាហ៍មុនដដែល ក្រុមហ៊ុន General Motors ក៏រងការព្រមានពីសំណាក់ប្រធានាធិបតី ដូណាល់ ត្រាំ ដែរ។
យ៉ាងណាមិញ លោក Ian Robertson ក៏បានអះអាងដែរថា ក្រុមហ៊ុនរបស់លោក កំពុងវិនិយោគលើការសាងសង់រោងចក្រនៅរដ្ឋ South Carolina ផងដែរ។ លោកក៏បានសង្កត់ធ្ងន់ថា បើគេគិតពីតម្លៃនាំចេញវិញ BMW គឺជាអ្នកនាំចេញឡានធំជាងគេរបស់អាមេរិក។ លោកបន្តថា៖ «យើងកំពុងកសាងរោងចក្រនៅម៉ិកស៊ិក ហើយយើងបានសាងសង់រោងចក្រនៅប្រេស៊ីលកាលពីឆ្នាំមុនរួចហើយដែរ។ យើងសាងសង់រោងចក្រនៅគ្រប់កន្លែងលើពិភពលោក ដើម្បីបំពេញកំណើនតម្រូវរបស់យើង»។
ការទាមទារឲ្យក្រុមហ៊ុនអាមេរិកងាកមករកស៊ីក្នុងស្រុក ជាគោលនយោបាយមួយរបស់ប្រធានាធិបតីជាប់ឆ្នោត ដូណាល់ ត្រាំ តាំងពីអំឡុងយុទ្ធនាការស្វែងរកសំឡេងឆ្នោតមកម្ល៉េះ។ លោកអះអាងថា ការដែលក្រុមហ៊ុនអាមេរិករកស៊ី ឬមានរោងចក្រនៅបរទេស ជាការលួចការងារជនជាតិអាមេរិក យកទៅឲ្យជនបរទេស ដូចនេះក្រុមហ៊ុនទាំងនោះ ត្រូវត្រឡប់ចូលស្រុកវិញ បើមិនចង់រងការដំឡើងពន្ធនាំចូលទេនោះ៕
ថ្មីៗ
អត្ថបទ : តន ចាន់រិទ្ធារ៉ា
No comments:
Post a Comment