ភ្នំពេញ៖ ក្នុងឆ្នាំ២០១៦ ស្ថានទូត និងអគ្គកុងស៊ុលខ្មែរ បានជួយសង្គ្រោះពលរដ្ឋខ្មែររងគ្រោះ ពីបណ្ដាប្រទេសជាង១០ បញ្ជូនមកកម្ពុជាវិញ។ នេះបើតាមសេចក្ដីប្រកាសព័ត៌មានក្រសួងការបរទេស និងសហប្រតិបត្តិការអន្តរជាតិ។
-ស្ថានឯកអគ្គរាជទូត និងអគ្គកុងស៊ុលខ្មែរប្រចាំប្រទេសវៀតណាម បានជួយសង្គ្រោះ និងសម្រួលការធ្វើមាតុភូមិនិវត្តន៍ពលរដ្ឋកម្ពុជា ដែលរស់នៅនិងធ្វើការខុសច្បាប់ និងរងគ្រោះដោយសារការជួញដូរឆ្លងកាត់តាមប្រទេសវៀតណាម ចំនួន២៣១នាក់ ។
-ស្ថានឯកអគ្គរាជទូតខ្មែរប្រចាំប្រទេសម៉ាឡេស៊ី បានជួយសង្គ្រោះ និងសម្រួលការធ្វើមាតុភូមិនិវត្តន៍ពលរដ្ឋ និងពលករ-ពលការិនី ដែលជួបលំបាកក្នុងការងារ និងរងគ្រោះដោយសារការជួញដូរមនុស្ស និងរំលោភបំពានផ្សេងៗ ចំនួន២៧២នាក់ក្នុងឆ្នាំ២០១៦។ កាលពីឆ្នាំ២០១៥ ជួយពលរដ្ឋខ្មែររងគ្រោះ៥៨នាក់ និង៣៤នាក់ កាលពីឆ្នាំ២០១៤។
-ស្ថានឯកអគ្គរាជទូតខ្មែរប្រចាំប្រទេសឥណ្ឌូនេស៊ី បានជួយសង្គ្រោះ និងសម្រួលការធ្វើមាតុភូមិនិវត្តន៍ពលរដ្ឋ ដែលភាគច្រើនជាពលកររងគ្រោះដោយសារការជួញដូរកម្លាំងពលកម្ម ទៅធ្វើជាកម្មករលើទូកនេសាទបរទេស ចំនួន៧៨នាក់ក្នុងឆ្នាំ២០១៦។ កាលពីឆ្នាំ២០១៥ ជួយពលរដ្ឋខ្មែររងគ្រោះ៤២៨នាក់ និង២៣នាក់ កាលពីឆ្នាំ២០១៤។
-ស្ថានឯកអគ្គរាជទូត និងអគ្គកុងស៊ុលខ្មែរប្រចាំប្រទេសចិន បានជួយសង្គ្រោះ និងសម្រួលការធ្វើមាតុភូមិនិវត្តន៍ស្ត្រីខ្មែរ ដែលរងគ្រោះដោយសារការបោកបញ្ឆោតយកទៅរៀបការនិងធ្វើការខុសច្បាប់ ចំនួន៦៤នាក់ក្នុងឆ្នាំ២០១៦។ កាលពីឆ្នាំ២០១៥ ជួយពលរដ្ឋខ្មែររងគ្រោះ១១៧នាក់ និង៥៤នាក់ កាលពីឆ្នាំ២០១៤។
-ស្ថានឯកអគ្គរាជទូត និងអគ្គកុងស៊ុលខ្មែរប្រចាំប្រទេសជប៉ុន បានជួយសង្គ្រោះ និងសម្រួលការធ្វើមាតុភូមិនិវត្តន៍ពលរដ្ឋ ចំនួន១៦នាក់ក្នុងឆ្នាំ២០១៦ ក្នុងនោះ ពលរដ្ឋ៩នាក់ ជាកម្មសិក្សាការី និង៧នាក់ជាជនរងគ្រោះដោយសារការជួញដូរផ្លូវភេទ។
ដោយឡែកពលរដ្ឋខ្មែរឆ្លងដែននិងធ្វើការខុសច្បាប់នៅប្រទេសថៃ ជាមធ្យម១ពាន់នាក់ក្នុងមួយសប្ដាហ៍ ដែលត្រូវបានអាជ្ញាធរថៃឃាត់ខ្លួននិងបញ្ជូនមកកម្ពុជាវិញក្នុងឆ្នាំ២០១៦នេះ ក្រោយពីមានការសម្របសម្រួលរវាងស្ថានទូត និងអគ្គកុងស៊ុលខ្មែរ និងអាជ្ញាធរថៃ។
ចំណែកពលរដ្ឋខ្មែររងគ្រោះ នៅប្រទេសសិង្ហបុរី ៦នាក់ , ប្រទេសឡាវ២នាក់,ប្រទេសហ្វីលីពីន៤នាក់, ប្រទេសអូស្ត្រាលី១នាក់, ប្រទេសអារ៉ាបប៊ីសាអូឌីត១នាក់ និងរុស្ស៊ី២នាក់ ត្រូវបានស្ថានទូត និងអគ្គកុងស៊ុលជួយសង្គ្រោះ និងបញ្ជូនមកកម្ពុជាវិញផងដែរ។នេះបើតាមក្រសួងការបរទេសកម្ពុជា៕
ថ្មីៗ
អត្ថបទ : ថ្មីៗ
No comments:
Post a Comment