ភ្នំពេញ: ក្រុមហ៊ុនចិនចំនួនពីរ ដែលមានមូលដ្ឋាន នៅប្រទេសកម្ពុជា គឺក្រុមហ៊ុន China Ocean Fishing សហការជាមួយក្រុមហ៊ុន Khmer Holding Group វិនិយោគលើ វិស័យវារីវប្បកម្មទឹកសាប និងសមុទ្រនៅកម្ពុជា ឲ្យទទួលបានជោគជ័យ ទឹកប្រាក់ចំនួន ១០០ លានដុល្លារ។
ក្នុងសិក្ខាសាលាបង្ហាញពី គម្រោងវិនិយោគ លើវិស័យនេះ ទៅដល់គណៈប្រតិភូ ជលផលកម្ពុជា នៅថ្ងៃទី១៨ ខែមករា លោក Gan Weiming ទេសាភិបាលប្រតិបត្តិ របស់ក្រុមហ៊ុននេសាទសមុទ្រចិន (China Ocean Fishing Holding Limited) បានឲ្យដឹងថា ក្រុមហ៊ុនបានត្រៀមខ្លួន រួចរាល់ហើយ នូវទឹកប្រាក់ចំនួន ១០០ លានដុល្លារ សម្រាប់ការវិនិយោគ លើវិស័យចិញ្ចឹមត្រី ក្នុងទឹកសាប និងទឹកសមុទ្រ នៅក្នុងប្រទេសកម្ពុជា។
លោក បានបន្តថា ការវិនិយោគ នឹងបែងចែកជា ៣ ដំណាក់កាល ដោយដំណាក់ទី១ វិនិយោគ ក្នុងទឹកប្រាក់ ១០ លានដុល្លារ ដំណាក់ទី២ ចំនួន ៣០ លានដុល្លារ និងដំណាក់ទី៣ ចំនួន ៦០ លានដុល្លារ។
លោក Gan បានឲ្យដឹងថា ក្រុមហ៊ុនរបស់លោក បានសហការជាមួយ ក្រុមហ៊ុន Khmer Holding Group ដឹកនាំដោយលោកឧកញ៉ា ឆាវ អ៊ិនទ័រ (CHAO Yunder) ដើម្បីវិនិយោគលើ វិស័យវារីវប្បកម្មទឹកសាប និងសមុទ្រឲ្យទទួលបានជោគជ័យ។ លោកបានថ្លែងថា គម្រោងវិនិយោគលើ វិស័យចិញ្ចឹមត្រី ក្នុងទឹកសាប និងទឹកសមុទ្រនេះ គឺក្នុងគោលបំណងផ្គត់ផ្គង់ តម្រូវការក្នុងស្រុក និងនាំចេញ។
លោក បានមានប្រសាសន៍បន្តថា ប្រទេសកម្ពុជា មានហេដ្ឋារចនាសម្ព័ន្ធ គ្រប់គ្រាន់ និងងាយស្រួល ដែលផ្តល់ឱកាសឲ្យក្រុមហ៊ុនរៀបចំបច្ចេកទេសចិញ្ចឹម និងប្រមូលផលនេសាទ កសាងឃ្លាំង បង្កើតរោងចក្រកែច្នៃ ផលនេសាទ សម្រាប់បម្រើឲ្យការផ្គត់ផ្គង់ក្នុងស្រុក និងការនាំចេញ ទៅកាន់ទីផ្សារអឺរ៉ុប និងសហរដ្ឋអាមេរិក។
លោក Gan បានឲ្យដឹងបន្ថែមថា ក្រុមហ៊ុនរបស់លោក នឹងសហការជាមួយប្រជាជនកម្ពុជា សម្រាប់ការវិនិយោគនេះ ដោយក្នុងនោះ ភាគីក្រុមហ៊ុន គឺជាអ្នកផ្តល់ពូជ ចំណី និងបច្ចេកទេស ដល់ពួកគាត់ ហើយផលដែលបានមក ពួកគាត់អាចលក់ឲ្យក្រុមហ៊ុនវិញ ក្នុងតម្លៃទីផ្សារ។ លោកបានបន្តថា នៅជំហានដំបូង ក្រុមហ៊ុន នឹងបង្កើតតំបន់ សាកល្បងចិញ្ចឹមត្រី ឌីឡាបយ៉ា ក្នុងផ្ទៃស្រះទំហំ ២០០ ហិកតា ក្នុងគម្រោងវិនិយោគ លើផ្ទៃស្រះជាង ២.០០០ ហិកតា។
លោកស្រី កាំង ឃីម អគ្គនាយករង រដ្ឋបាលជលផល បានស្វាគមន៍ និងគាំទ្រ ចំពោះគម្រោងវិនិយោគ ពីវិស័យអនុផលទាំងទឹកសាប និងទឹកប្រៃ នៅក្នុងប្រទេសកម្ពុជា។ លោកស្រី បានឲ្យដឹងថា ក្រសួងកសិកម្ម រុក្ខាប្រមាញ់ និងនេសាទ កំពុងពិនិត្យឯកសារ នៃគម្រោងវិនិយោគនេះ មុននឹងឈានដល់ ការចុះកិច្ចព្រមព្រៀង លើអនុស្សរណៈយោគយល់ (MoU) រវាងក្រុមហ៊ុន និងរដ្ឋបាលជលផល៕
CEN
ដោយ: ដាវុធ
No comments:
Post a Comment