តាកែវ: អភិបាលខេត្តតាកែវ ព្រមានចាត់វិធានការតាមផ្លូវច្បាប់ ដល់មន្ត្រីខិលខូច ដែលមិនស្តាប់តាមអនុសាសន៍ របស់រាជរដ្ឋាភិបាល ហើយនៅបន្តអនុញ្ញាត អោយជនជាតិវៀតណាមជូលដីធ្វើស្រែនៅតាមស្រុកចំនួនបីដែលឋិតជាប់ព្រំដែនកម្ពុជាវៀតណាម។
លោក ឡាយ វណ្ណៈ អភិបាលខេត្តតាកែវ បានព្រមានបែបនេះ ក្នុងពិធីសន្និបាតបូកសរុបលទ្ធផលការងាររដ្ឋបាលខេត្តតាកែវប្រចាំឆ្នាំ ២០១៦ និងលើកទិសដៅភារកិច្ចឆ្នាំ ២០១៧ រយៈពេល ២ថ្ងៃ នៅរោងមហោស្រពខេត្ត កាលពីថ្ងៃទី១៨ មករា ២០១៧ ដែលមានមន្ត្រីរាជការ អភិបាលស្រុកក្រុង មន្ទីរជុំវិញខេត្ត និងកងកំលាំងប្រដាប់អាវុធគ្រប់ប្រភេទ ចូលរួមស្តាប់ ។
លោកបានជំរុញអោយអភិបាលស្រុកទាំងបី ក្នុងនោះមានស្រុក អង្គរបូរី ស្រុកបូរីជលសារ និងស្រុកកោះអណ្តែត ដែលមានដីស្រែឋិតនៅជាប់ តំបន់ព្រំដែនកម្ពុជាវៀតណាម នោះ ត្រូវចុះទៅពន្យល់ដល់ម្ចាស់ដីស្រែ អោយឈប់ជួលដីដល់ជនជាតិវៀតណាម ព្រោះរាជរដ្ឋាភិបាល បានចេញនៅសេចក្តីណែនាំរួចហើយ ដូច្នេះបើសិនជាមន្ត្រីណា ដែលហ៊ានអនុញ្ញាតអោយវៀតណាម ចូលធ្វើស្រែលើដីខ្មែរទៀតនោះ លោកនិងចាត់វិធានការតាមផ្លូវច្បាប់ជាមិនខាន ។
គួរបញ្ជាក់ផងដែរថា ផ្ទៃដីស្រែដែលមាននៅតាមតំបន់ព្រំដែនកម្ពុជាវៀតណាម រវាងខេត្តតាកែវ និងខេត្តអាងយ៉ាង ដែលមានទំហំ ៤ពាន់ហិកតា នោះ នឹងត្រូវបានក្រុមហ៊ុនឡុង ចាវហ្វូ របស់ក្រុងស៊ាងយ៉ាង ខេត្តហ៊ូប៉ី នៃសាធារណរដ្ឋប្រជានិច្ចចិន ជួលដាំស្រូវសម្រាប់ ធ្វើការនាំចេញទៅប្រទេសចិន បន្ទាប់ពីបានធ្វើការចុះកិច្ចព្រមព្រៀង រវាងខេត្តតាកែវ និងក្រុងស៊ាងយ៉ាង កាលពីសប្តាហ៍មុន ៕
CEN
ដោយ: តាកែវ
No comments:
Post a Comment