កំពង់ស្ពឺ: ទំនប់បិលជាអាងស្តុបទឹក ដ៍ធំមួយរបស់ ខេត្តកំពង់ស្ពឺ ដែលមានវិសាលភាព ស្រោចស្រពលើផ្ទៃដីស្រែ រាប់ពាន់ហិកតា របស់ក្រុងច្បារមន និង ស្រុក សំរោងទង ស្រាប់ស្ងាត់ៗចុងក្រោយនេះ មានអ្នកបោះបង្គោល រំលោភយកធ្វើកម្មសិទ្ធិ ប៉ុន្តែខាងអាជ្ញាធរពាក់ព័ន្ធ និងមន្ត្រីជំនាញធនធានទឹក មិនបានទប់ស្កាត់សោះ បណ្តោយឱ្យមានការរំលោភ ទាំងបំពានផ្ទៃបឹង របស់រដ្ឋទៅវិញ ។
បញ្ហារំលោភយកដីបឹង របស់រដ្ឋ មហាជនរង់ចាំចំណាត់ការ របស់អាជ្ញាធរខេត្តកំពង់ស្ពឺ មានវិធានយ៉ាងណា ទៅលើអ្នកដែលបោះបង្គោល កាន់កាប់ផ្ទៃបឹងនោះ ខណៈដែលប្រធានមន្ទីរធនធានទឹកខេត្ត អះអាងថា មានធ្វើលិខិតដាក់ជូនលោកអភិបាលខេត្ត រួចរាល់ហើយនោះ ។
អាងស្តុកទឹកដ៍ធំហ្វឹងល្វើយនេះ ដែលមានលទ្ធភាព ស្រោចស្រពផ្ទៃដីស្រែចំការ រាប់ពាន់ហិកតា ត្រូវបានគេបោះបង្គោល អង្កន់ជាឡូរៗ និងដាក់ស្លាកប្រកាសលក់ យ៉ាងចំហ ហើយមួយផ្នែកត្រូវបានគេចាក់ដី ព្រមទាំងសាងសង់សំណង់រឹងមាំ យ៉ាងរំភើយនោះ ។
ប្រជាពលរដ្ឋរស់នៅក្បែរបឹងស្តុកទឹក ដែលត្រូវបានក្រុមអ្នកមាន លុយរំលោភ យកនោះមានឈ្មោះទំនប់បិល ស្ថិតតាមផ្លូវពីសាលាខេត្ត ទៅភ្នំជៀល ក្នុងឃុំស្គុះ ស្រុកសំរោងទង ខេត្តកំពង់ស្ពឺ ផ្ទៃបឹងទាំងសងខាងផ្លូវ ត្រូវបានគេបោះបង្គោលអង្កន់ជាឡូរៗ ដោយអ្នកខ្លះដាក់ប្រកាស លក់យ៉ាងចំហ ជាដីបឹងរបស់រដ្ឋនោះ ។
ប្រភពបន្តថា ក្រុមអ្នកកាន់កាប់រំលោភ យកដីបឹងរបស់រដ្ឋ និងជាអាងស្តុកទឹក ខួបប្រាំង វស្សានោះ ភាគច្រើន ជាអ្នកមានលុយ ហើយអស់លោក ជាអាជ្ញាធរពាក់ព័ន្ធ ក៍ដូចមន្ទីរជំនាញ ធនធានទឹកខេត្ត មិនបានទប់ស្កាត់ ឬហាមឃាត់ទេ ដោយសង្កេតឃើញថា ដីបឹងមួយ ផ្នែកត្រូវបានចាក់ដីលប់ និងសង់ផ្ទះរឹងមាំទៅហើយនោះ ។
ស្ត្រីជាម្ចាស់ដីម្នាក់ បានប្រាប់ថា គាត់បានទិញដី បឹងបិលនេះ ពីប្រជាពលរដ្ឋដោយមាន ការទទួលស្គាល់ប្រថាប់ត្រា ត្រឹមត្រូវពីអាជ្ញាធរ មូលហេតុដែលគាត់ទិញដីនោះ ព្រោះមានឮតៗគ្នា រដ្ឋធ្វើផ្លូវល្បឿនលឿន កាត់តាមតំបន់នេះ ប៉ុន្តែបច្ចុប្បន្ន ស្ងាត់ឈឹងរកលក់វិញ ក៍មិនចេញទៀត ។
ប្រភពបន្តថា ចំពោះដីដែលគាត់បានទិញ មិនត្រឹមមាន តែការទទួលស្គាល់ ពីអាជ្ញាធរនោះទេ គឺមានទាំងប័ណ្ណកម្មសិទ្ធិ ស្របច្បាប់ចេញ ដោយមន្ទីររៀបចំដែនដី នគរូបនីយកម្ម សំណង់ និងភូមិបាលទៀតផង ។
លោកញាញ់ ជាបហ័រ ប្រធានមន្ទីរធនធានទឹក និងឧតុនិយម ខេត្តកំពង់ស្ពឺ បានថា ករណីរំលោភយក ដីបឹងដោយសារ ប្រជាពលរដ្ឋនាំគ្នាចូល ទៅបោះបង្គោល ហើយខាងមន្ទីរធនធានទឹក បានផ្ញើលិខិតទៅកាន់លោក អភិបាលខេត្តកំពង់ស្ពឺ រួចរាល់អស់ អំពីបញ្ហានេះ ប៉ុន្តែមិនទាន់មានចំណាត់ការ ណាមួយនៅឡើយទេ ។ លោកបានបន្តថា ចំពោះពាក់ព័ន្ធដីអាងស្តុករបស់រដ្ឋ ដែលកំពុងរងការរំលោភ ហើយមានប្លង់កម្មសិទ្ធិស្របច្បាប់នោះលោកមិនទាន់ទទួលបានព័ត៌មានច្បាស់លាស់ទេ៕
CEN
ដោយ: ដាវុធ
No comments:
Post a Comment