ភ្នំពេញ: គណបក្សសង្គ្រោះជាតិ បានបដិសេធ ចំពោះការចោទប្រកាន់ របស់លោកសួន សេរីរដ្ឋា ប្រធានគណបក្សអំណាចខ្មែរ ថា គណបក្សសង្គ្រោះជាតិ ឲ្យអ្នកចង់ឈរឈ្មោះ ជាបេក្ខជនក្រុមប្រឹក្សា ឃុំ-សង្កាត់ ត្រូវបង់លុយ ម្នាក់៣៥០ដុល្លារ ទើបអាចឈរឈ្មោះបាន និងតម្រូវឲ្យបង់លុយថ្លៃ ឈរឈ្មោះជាតំណាងរាស្ត្រ និងលក់លេខរៀង ថ្លៃរហូតពី ៥ ទៅ ៦ម៉ឺនដុល្លារ ។
លោក យ៉ែម បុញ្ញឫទ្ធិ អ្នកនាំពាក្យគណបក្សសង្គ្រោះជាតិ បានអះអាងថា អ្វីដែលលោកសួន សេរីរដ្ឋា បានលើកឡើង គឺជាការមិនពិត ពីព្រោះអ្វីដែលជាគោលការណ៍ របស់គណបក្ស ក្នុងការរៀបចំបេក្ខជនឈរឈ្មោះ គឺបើកជំហរទទួល យកខ្មែរគ្រប់រូប ដែលមានបំណង ចង់ឈរឈ្មោះ ជាបញ្ជីរបស់គណបក្សសង្គ្រោះជាតិ។ ហើយគោលវិនិច្ឆ័យមាន៣ គឺទី១.ក្រមសីលធម៌ សមត្ថភាព។ ទី២.ការយល់ដឹង ពីគោលនយោបាយ សកម្មភាពការងារ និងទី៣.កំណត់លទ្ធភាព ក្នុងការបំពេញការងារ។ ដូច្នេះមិនបាននិយាយពីថវិកានោះទេ។ ប៉ុន្តែគណបក្សសង្គ្រោះជាតិ បានកំណត់មួយហៅថា ការចំណាយ នៅក្នុងយុទ្ធនាការឃោសនា នៅក្នុងឃុំ សង្កាត់ នីមួយៗ គឺថ្នាក់ដឹកនាំខេត្ត ស្រុក ឃុំ នាំគ្នាប្រជុំពិគ្រោះយោបល់ ដើម្បីរកប្រាក់ សម្រាប់ចំណាយ នៅក្នុងពេលធ្វើយុទ្ធនាការ បោះឆ្នោតម្តងៗ។
ទាក់ទងការចោទថា យកលុយពី ៥ ទៅ ៦ ម៉ឺនដុល្លារ ដើម្បីឈរឈ្មោះ តំណាងរាស្ត្រ ត្រូវបានអ្នកនាំពាក្យ គណបក្សសង្គ្រោះជាតិ បញ្ជាក់ថា ចំពោះព័ត៌មាននេះ ក៏មិនពិតដែរ។ ហើយរាល់បេក្ខជនរបស់ គណបក្សសង្គ្រោះជាតិ គឺចូលរួមចំណែករៀបចំ ធ្វើគំរោងយុទ្ធនាការឃោសនា ទាំងថ្នាក់ជាតិ ទាំងថ្នាក់ខេត្ត ថ្នាក់ឃុំ ស្រុក ដូច្នេះមិនមាននៅក្នុងគោលការណ៍គណបក្ស ឬមួយក៏ត្រូវកំណត់ថា យកលុយនោះទេ។ នេះគឺជាការមួលបង្កាច់ ចោទប្រកាន់ ដោយខុសការពិត។
លោកសួន សេរីដ្ឋា ប្រធានគណបក្សអំណាចខ្មែរ បានទម្លាយរឿងសម្ងាត់របស់គណបក្សសង្គ្រោះជាតិ ដែលបានឲ្យអ្នកចង់ឈរឈ្មោះ ជាបេក្ខជនក្រុមប្រឹក្សា ឃុំ-សង្កាត់ ត្រូវបង់លុយ ម្នាក់ ៣៥០ ដុល្លារ ទើបអាចឈរឈ្មោះបាន និងតម្រូវឲ្យបង់លុយថ្លៃឈរឈ្មោះជាតំណាងរាស្ត្រ និងលក់លេខរៀងថ្លៃរហូតពី ៥ ទៅ ៦ម៉ឺនដុល្លារ ។ ប៉ុន្តែអ្នកនាំពាក្យគណបក្សសសង្គ្រោះជាតិ បានបដិសេធថា នេះមិនមែនជាការពិតទេ គឺជាការមួលបង្កាច់ចោទប្រកាន់ខុសពីការពិត។
លោកសួន សេរីរដ្ឋា បានឲ្យដឹង កាលពីព្រឹកថ្ងៃទី០៣ ខែមករា ថា លោកបានទទួលទូរស័ព្ទ ពីមន្ត្រីគណបក្សសង្គ្រោះជាតិ ខេត្តបាត់ដំបង និងខេត្តបន្ទាយមានជ័យ សួរលោកថា “តើបេក្ខជនឈរឈ្មោះ ឃុំ-សង្កាត់ របស់គណបក្សអំណាចខ្មែរ តម្រូវឲ្យបង់លុយថ្លៃ ឈរឈ្មោះ ឬទេ? ពួកគាត់បន្តថា ខាងគណបក្សសង្គ្រោះជាតិ គេតម្រូវឲ្យអ្នកចង់ឈរឈ្មោះ ជាបេក្ខជនក្រុមប្រឹក្សាឃុំ-សង្កាត់ ត្រូវបង់លុយម្នាក់៣៥០ដុល្លារ ទើបអាចឈរឈ្មោះបាន”។
លោកបានឆ្លើយប្រាប់មន្ត្រីគណបក្សសង្គ្រោះជាតិ ថា គណបក្សអំណាចខ្មែរ មិនមានគោលការណ៍ តម្រូវឲ្យអ្នកចង់ឈរឈ្មោះ បង់លុយថ្លៃឈរឈ្មោះទេ និងមិនថា តែបេក្ខជនសម្រាប់ឃុំ-សង្កាត់ ទេ សូម្បីបេក្ខជនសមាជិកសភា តំណាងពលរដ្ឋ ក្នុងសភាជាតិ ក៏មិនលក់លេខរៀង យកលុយពីបេក្ខជនដែរ មានតែអ្នកជួយគាំទ្រ គណបក្សអំណាចខ្មែរ ពីក្រៅប្រទេស គេជួយថែមទៀត បើបេក្ខជននោះ សកម្មមានប្រជាប្រជាប្រីយ ទទួលបានការគាំទ្រច្រើន ពីពលរដ្ឋក្នុងមណ្ឌល។
ប្រធានគណបក្សអំណាចខ្មែរ បានបញ្ជាក់ថា “បើបេក្ខជនឃុំ-សង្កាត់ ម្នាក់តម្រូវឲ្យបង់លុយថ្លៃឈរឈ្មោះ និងលក់លេខរៀង ថ្លៃរហូតដល់ទៅ ៣៥០ដុល្លារ ហើយបេក្ខជនសភា តម្រូវឲ្យបង់លុយថ្លៃឈរឈ្មោះ និងលក់លេខរៀងថ្លៃរហូត ៥ ទៅ ៦ ម៉ឺនដុល្លារ បែបនេះ តើគណបក្សនោះ ជាគណបក្សចោរប្លន់មែនទេ ?។ មេដឹកនាំ គេមានជាតិ នៅពីលើក្បាល ឬលុយនៅពីលើក្បាល ? ហើយកន្លងមក បេក្ខជនដែលឈរឈ្មោះ ជាប់ឈ្មោះនោះ គឺសុទ្ធតែអ្នកយកលុយ ទៅទិញលេខរៀងឈរឈ្មោះទាំងអស់ បែបហ្នឹងហើយបានជាកំសាកល្ងង់ ហើយអសមត្ថភាព និងមិនហ៊ានដឹកនាំ អ្នកគាំទ្រតវ៉ាការពារ ប្រយោជន៍ជាតិនោះ”៕
CEN
ដោយ: មុនីរាជ
No comments:
Post a Comment