ភ្នំពេញ៖ ក្រោយកិច្ចប្រជុំជាមួយសាលារាជធានីភ្នំពេញកាលពីរសៀលថ្ងៃទី២០មករា ជនពិការបានយល់ព្រមបញ្ឈប់ការប្រគំតន្ត្រីនៅតាមទីកន្លែងសាធារណៈ ជាពិសេសតាមដងផ្លូវពិសេសនៅតាមផ្លូវកែងដែលមានភ្លើងសញ្ញាចរាចរណ៍។ សាលារាជធានីភ្នំពេញវិញបាន សន្យាសាងសង់ឆាកតន្ត្រីចំនួន៣កន្លែង សម្រាប់ពួកគេប្រកបរបរនេះ។ លោក ងឹម សៅរ័ត្ន នាយកអង្គការជនពិការកម្ពុជា បានសំណូមពរឲ្យសាលារាជធានី ពង្រីកឆាកតន្ត្រីចំនួន២កន្លែងទៀត ដោយលោកលើកហេតុផល ថា ការផ្តល់ឲ្យតែ៣កន្លែងនេះ មិនអាចគ្រប់គ្រាន់នោះទេ ខណៈជនពិការមានចំនួនច្រើននោះ។
ក្រោយជំនួបជាមួយលោក ប៉ា សុជាតិវង្ស អភិបាលរាជធានីភ្នំពេញ កាលពីថ្ងៃទី២០ មករា ក្រុមតន្ត្រីជនពិការ បានឯកភាពគ្នាក្នុងការឈប់ច្រៀងតាមទីសាធារណៈក្នុងរាជធានីភ្នំពេញ ដោយពួកគេបានយល់ព្រម ប្រកបរបរប្រគំតន្ត្រីនេះ នៅតាមទីតាំងដែលរដ្ឋបាលរាជធានីភ្នំពេញរៀបចំជូនចំនួន៣កន្លែង។ ទីតាំងទាំងនោះរួមមាន៖ រមណីយដ្ឋានវត្តភ្នំ អតីតទីលានប្រជាធិបតេយ្យ និងសួនច្បារមុខវត្តបទុមវត្តី។
ការរៀបចំឆាកតន្ត្រីទាំងបីកន្លែងខាងលើ គឺអាជ្ញាធររាជធានីភ្នំពេញ ជាអ្នកទទួលខុសត្រូវក្នុងការសាងសង់។ បន្ថែមពីនេះ មន្ទីរសង្គមកិច្ចរាជធានីភ្នំពេញបានសន្យាជួយជនពិការទាំងអស់ ដូចជា៖ ការពង្រឹងសមត្ថភាព ចំណេះ ជំនាញ ដើម្បីពួកគេមានលទ្ធភាពរកបានការងារថ្មីទៀត។ នេះបើតាមទំព័រហ្វេសប៊ុករបស់រដ្ឋបាលសាលារាជធានីភ្នំពេញ ដែលចេញផ្សាយកាលពីថ្ងៃម្សិលមិញ។
ទាក់ទងនិងបញ្ហានេះ លោក ងិន សៅរ័ត្ន នាយកអង្គការជនពិការកម្ពុជា បានប្រាប់សារព័ត៌មានថ្មីៗថា លោកយល់ស្របនឹងការសម្រេចនេះ។ លោកនិយាយថា៖«ការសម្រេចនេះ នឹងជួយសោភណ្ឌភាពទីក្រុង និងកាត់បន្ថយការកកស្ទះចរាចរណ៍»។ យ៉ាងណាក៏ដោយ លោកនៅតែបារម្ភថា ការអនុញ្ញាតឲ្យជនពិការប្រគំតន្ត្រីតែ៣កន្លែង គឺពិតជាពិបាកណាស់ ពីព្រោះ ជនពិការមានច្រើន។ ម្យ៉ាងទីលានប្រជាធិបតេយ្យមានសភាពស្ងប់ស្ងាត់ ដែលមិនអាចធ្វើឲ្យក្រុមជនពិការរកចំណូលបានដែលអាចនឹងប៉ះពាល់ដល់ជីវភាពរបស់ជនពិការ។ លោកសំណូមពរដល់សាលារាជធានីភ្នំពេញ ឲ្យបន្ថែមកន្លែងចំនួនពីរទៀត ដូចជា ផ្សាររាត្រី និងមាត់ទន្លេជាដើម ដែលជាទីកន្លែងមនុស្សហាត់ប្រាណច្រើន។ លើសពីនេះ លោកសុំឲ្យ សាលារាជធានីភ្នំពេញ ឧបត្ថម្ភថវិកា ឬអង្ករ និងសម្ភារៈចាំបាច់មួយចំនួន ដល់ជនពិការ ក្នុងតំណាក់កាលពួកគេដូរទីតាំងថ្មី ដែលមិនប្រាកដប្រជាលើចំណូលពីសប្បុរជននោះ។
សូមបញ្ជាក់ថា ជនពិការច្រៀងតាមទីសាធារណៈបច្ចុប្បន្នមាន ២១ក្រុម ដោយសាលារាជធានីភ្នំពេញ បានច្របាច់បញ្ចូលគ្នាជា ០៥ក្រុម ដែលមានសមាជិកសរុបចំនួន ១៩៤នាក់៕
ថ្មីៗ
អត្ថបទ : រ៉ឹម ភារី
No comments:
Post a Comment