ភ្នំពេញ ៖ នៅក្នុងសំណុំរឿងដ៏ចម្រូងចម្រាសរវាង កញ្ញា វ៉ាន់ នីឡា និងកូនមន្ត្រីជាន់ខ្ពស់ លោក កុយ ប៊ុនសន លោក សុខ ជំនោរ អ្នកនិពន្ធបទចម្រៀងនៅផលិតកម្មរស្មីហង្សមាស ត្រូវជាបងប្រុសរបស់កញ្ញា សុខ ចិន្ដា ហៅ វ៉ាន់ នីឡា បញ្ជាក់ថា នឹងប្តឹងទៅតុលាការមហាជនម្តង បន្ទាប់ពីសម្តែងក្តីអស់សង្ឃឹមជាខ្លាំងចំពោះចំណាត់ការរបស់សាលាដំបូងរាជធានីភ្នំពេញ ដែលសម្រេចមិនឃុំខ្លួនជនត្រូវចោទ។
ការប្រកាសជំហរប្តឹងទៅតុលាការមហាជននេះ ក៏ធ្វើឡើងបន្ទាប់ពី ឈ្មោះ គុយ សិទ្ធិសក្តិ ជាមន្ត្រីប៉ូលិសពាក់ស័ក្ដិ៤កន្លះ បម្រើការងារនៅអគ្គនាយកដ្ឋានពន្ធនាគារក្រសួងមហាផ្ទៃ ដែលគេស្គាល់ថាជាកូនប្រុសរបស់ លោក គុយ ប៊ុនសន អតីតអគ្គនាយកនៃអគ្គនាយកដ្ឋានពន្ធនាគារក្រសួងមហាផ្ទៃ បានចូលបំភ្លឺតុលាការជាបន្តបន្ទាប់រួចហើយនាពេលកន្លងមក ហើយជនត្រូវចោទនេះ ក៏ត្រឡប់មកវិញដោយសុវត្ថិភាពផងដែរ ពោលគឺ ពុំត្រូវបានតុលាការសម្រេចឃុំខ្លួនដាក់ពន្ធនាគារនោះទេ។ រីឯ កញ្ញា វ៉ាន់ នីឡា ហាក់ដូចជាក្តាប់ព័ត៌មានមិនបាន នៅតែអះអាងថា ឈ្មោះ គុយ សិទ្ធិសក្តិ នៅតែគេចវេះមិនចូលបំភ្លឺតុលាការ។
ចំណែកលោក សុខ ជំនោរ ដែលឈឺចាប់ក្នុងរឿងក្ដីនេះបានសរសេរលើបណ្តាញសង្គមហ្វេសប៊ុកថា ” ខ្ញុំចាប់ផ្តើមរៀបរាប់ដំណើររឿង និងការដាក់ពាក្យបណ្ដឹងជាសាធារណៈ ប្តឹងទៅកាន់តុលាការមហាជនវិញម្តង “។
សូមបញ្ជាក់ថា ជនត្រូវចោទ គុយ សិទ្ធិសក្តិ ជាប់ចោទពីបទ ”ហិង្សាដោយចេតនា និងចែកចាយរូបភាពអាសអាភាស” ប្រព្រឹត្តនៅរាជធានីភ្នំពេញ កាលពីអំឡុងឆ្នាំ២០១៦ តាមមាត្រា២១៧ នៃក្រមព្រហ្មទណ្ឌ និង មាត្រា៣៨ និងមាត្រា៣៩ ច្បាប់ស្តីពីការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទ ពាក់ព័ន្ធករណីថតរូបភាពអាសអាភាស ហើយបង្ហោះក្នុងហ្វេសបុក។
ជាមួយគ្នានេះ លោកមេធាវី នួន បូរ៉ា ជាមេធាវីការពារផ្លូវច្បាប់ឲ្យ វ៉ាន់ នីឡា កាលពីថ្ងៃទី២៣ ខែធ្នូ ឆ្នាំ២០១៦ ទើបតែដាក់ពាក្យចូលទៅចៅក្រមស៊ើបសួរសាលាដំបូងរាជធានីភ្នំពេញ លោក ឆែ វីរៈ ដើម្បីសុំថតចម្លងសំណុំរឿងយកមកសិក្សាប៉ុណ្ណោះ។
ក្នុងពាក្យសុំថតចម្លងសំណុំរឿងលោកមេធាវីបានបញ្ជាក់អំពីឯកសារ ដែលត្រូវសុំថតចម្លងរួមមាន ចម្លើយរបស់ជនជាប់ចោទនៅចៅក្រមស៊ើបសួរដីកាសម្រេចមិនឃុំខ្លួនជនត្រូវចោទ ឯកសារដែលជនត្រូវចោទដាក់ចូលតុលាការ កំណត់ហេតុសួរចម្លើយជនត្រូវចោទ និងសេចក្ដីសម្រេចរបស់របស់តុលាការ ឬឯកសារពាក់ព័ន្ធនឹងសំណុំរឿព្រហ្មទណ្ឌលេខ៣៥៣៤ ចុះថ្ងៃទី២៦ ខែកក្កដា ឆ្នាំ២០១៦ ក្រោយកាលបរិច្ឆេទថ្ងៃទី១២ ខែធ្នូ ឆ្នាំ២០១៦ មកដល់ថ្ងៃទី២៣ ខែធ្នូ ឆ្នាំ២០១៦៕
កម្ពុជាថ្មី
មករា
No comments:
Post a Comment