រតនគិរី: នៅទីបំផុត លោក ឆាយ ធី អតីតអ្នកសម្របសម្រួល នៃសមាគមការពារ សិទ្ធិមនុស្សអាដហុក បានក្លាយទៅជាសមាជិកគណបក្សប្រជាជនកម្ពុជា ជាផ្លូវការហើយ។ លោក ឆាយ ធី បានប្រកាសថា ការសម្រេចចិត្ត របស់លោក គឺមិនមានការបង្ខិតបង្ខំ ឬការទិញទឹកចិត្តពី គណបក្សប្រជាជននោះទេ ។ លោកមិនមានជំនឿ លើថ្នាក់ដឹកនាំ គណបក្សសង្គ្រោះជាតិនោះទេ ពីព្រោះថ្នាក់ដឹកនាំ គណបក្សសង្គ្រោះជាតិ មានអត្តចរិតមិនល្អ មានស្រីញី មិនចេះទទួលខុសត្រូវ ដើរសន្យាខ្យល់ ជាមួយសមាជិក ។
លោកទេសរដ្ឋមន្ត្រី លី ធុជ សមាជិកគណៈកម្មាធិការកណ្តាល គណបក្សប្រជាជនកម្ពុជា និងជាក្រុមការងារថ្នាក់ជាតិ ចុះជួយខេត្តរតនគិរី បានអញ្ជើញជាអធិបតី ក្នុងពិធីប្រកាសទទួលស្គាល់ ពីក្រុមមេដឹកនាំគណបក្ស កាន់អំណាចប្រចាំខេត្ត ភាគឦសានមួយនេះ នៅព្រឹកថ្ងៃទី៨ ខែមករា ឆ្នាំ២០១៧។
លោកទេសរដ្ឋមន្ត្រី លី ធុជ បានលើកឡើង ក្នុងឱកាសនោះថា លោក ឆាយ ធី មានអាយុ៤៨ឆ្នាំ បានបម្រើការងារ នៅសមាគមសិទ្ធិមនុស្ស អាដហុក ជិត១០ឆ្នាំ ជួយដោះស្រាយ ប្រជាពលរដ្ឋបញ្ហាដីធ្លី បញ្ហាសិទ្ធិមនុស្ស ការកាប់បំផ្លាញធនធានធម្មជាតិ ជាដើម ហើយត្រូវបានប្រជាពលរដ្ឋ គោរពស្រឡាញ់ បានដាក់ពាក្យសុំចូលរួមជា សមាជិកបក្សប្រជាជនកម្ពុជា ពេញសិទ្ធ ចាប់ពីពេលនេះតទៅ។
បន្ទាប់ពីបញ្ចប់ពិធីតែងតាំងរួចមក លោកឆាយ ធី បានប្រាប់ក្រុមអ្នកសារព័ត៌មាន ក្នុងសន្និសីទសារព័ត៌មាន នាព្រឹកថ្ងៃទី៨ ខែមករា ឆ្នាំ២០១៧ នៅសាលប្រជុំមន្ទីរគណបក្សប្រជាជនកម្ពុជា ខេត្តរតនគិរី ថា ការដែលលោក សម្រេចចិត្តចូលរួមរស់ជាមួយ គណបក្សប្រជាជនកម្ពុជា ដឹកនាំដោយសម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា និងជានាយករដ្ឋមន្ត្រី ព្រោះគណបក្សនោះ បានធ្វើការងារធំៗជាច្រើន សម្រាប់ប្រជាជន និងប្រទសជាតិ ដោយបានរំដោះប្រទេសកម្ពុជា ចេញពីរបបប្រល័យពូជសាសន៍ ប៉ុល ពត និងដណ្តើមបានមកវិញ នូវសិទ្ធិសេរីភាព ជូនដល់ប្រជាពលរដ្ឋកម្ពុជា គ្រប់រូប។ ជាពិសេស បានបង្រួបបង្រួមជាតិ បញ្ចប់សង្គ្រាមស៊ីវិល នៅកម្ពុជា តាមយុទ្ធសាស្ត្រឈ្នះឈ្នះ របស់សម្តេចតេជោ ធ្វើឱ្យប្រទេសជាតិ មានការឯកភាពទឹកដីទាំងស្រុង ប្រជាជនមានសិទ្ធិសេរីភាព ពេញបូរិបូរណ៍ ហើយធ្វើកសាងប្រទេសជាតិ មានការរីកចំរើន លើគ្រប់វិស័យ។
លោក ឆាយ ធី បានបន្តថា ការសម្រេចចិត្តរបស់លោក គឺមិនមានការបង្ខិតបង្ខំ ឬការទិញទឹកចិត្ត ពីគណបក្សប្រជាជននោះទេ គឺជាការស្ម័គ្រចិត្តរបស់លោក ពីព្រោះលោក អាចមានឱកាសច្រើន ក្នុងការបម្រើប្រជាពលរដ្ឋ ជាពិសេសលោកពេញចិត្ត គោលនយោបាយរបស់ គណបក្សប្រជាជនកម្ពុជា ដែលការពារដាច់ខាតឯករាជ អធិបតេយ្យ និងបូរណភាពទឹកដី ថែរក្សាសន្តិភាព ស្ថេរភាពនយោបាយ សន្តិសុខ សណ្តាប់ធ្នាប់សាធារណៈ និងការគោរពសិទ្ធិមនុស្ស។
លោក ឆាយ ធី បានលើកឡើងថា លោកមិនមានជំនឿ លើថ្នាក់ដឹកនាំ គណបក្សសង្គ្រោះជាតិ នោះទេ ពីព្រោះថ្នាក់ដឹកនាំ គណបក្សសង្គ្រោះជាតិ មានអត្តចរិតមិនល្អ មានស្រីញី មិនចេះទទួលខុសត្រូវ ដើរសន្យាខ្យល់ ជាមួយសមាជិក សមាជិកា និងប្រជាពលរដ្ឋតាមមូលដ្ឋាន។ លោកបានបញ្ជាក់ថា "ថ្នាក់ដឹកនាំ CNRP ប្រើប្រាស់គោលនយោបាយ ប្រជាភិថុត ដើម្បីឈ្នះឆ្នោត និងការកាន់អំណាច ហ៊ានធ្វើអ្វីៗគ្រប់យ៉ាង ដោយមិនគិតពី ស្ថេរភាពនយោបាយ ថ្នាក់ដឹកនាំ CNRP មានចរិកចង្អៀតចង្អល់ គ្មានចរិតបង្រួបបង្រួមជាតិ ដូចជា ប្រើប្រាស់ពាក្យសម្ដីថា បើមានស៊ី អត់សែន មានសែន អត់ស៊ី គណបក្សសង្គ្រោះជាតិ មិនមានគោលនយោបាយ ច្បាស់លាស់ ហើយមានតែគោលនយោបាយ ខ្យល់ ភូតកុហក បោកប្រាស់"។
នៅលើសេចក្ដីប្រកាសព័ត៌មានមួយ លោក ឆាយ ធី បានបញ្ជាក់នូវ មូលហេតុ ៣ចំណុច ដែលជំរុញឲ្យលោកលាឈប់ ពីការងារសិទ្ធិមនុស្ស ទៅឈរឈ្មោះជាមេឃុំ តំណាងឲ្យបក្សកាន់អំណាច។ ក្នុងមូលហេតុទាំង ៣ ចំណុចនោះ លោក ឆាយ ធី បានកោតសរសើរ ការដឹកនាំរបស់លោក នាយករដ្ឋមន្ត្រី ហ៊ុន សែន ហើយផ្ទុយទៅវិញ លោកបានរិះគន់ទៅលើ មេដឹកនាំគណបក្សប្រឆាំង។ ការចូលរួមរបស់ សកម្មជនការពារសិទ្ធិមនុស្សរូបនេះ ត្រូវបានគេមើលឃើញថា កើតឡើងចំពេលដែល សហការី ៤រូប និងលោក នី ចរិយា អតីតមន្ត្រីសមាគមអាដហុក កំពុងជាប់ឃុំ។
សូមបញ្ជាក់ថា លោក ឆាយ ធី ត្រូវបានប្រកាសចូលជា សមាជិក CPP ពេញសិទ្ធិជាផ្លូវការ និងដាក់ជាបេក្ខភាពឈរ ឈ្មោះមេឃុំប៉ាតេ ស្រុកអូរយ៉ាដាវ។ មេឃុំប៉ាតេ ស្រុកអូរយ៉ាដាវ នាពេលបច្ចុប្បន្ននេះ គ្រប់គ្រងដោយគណបក្សសម រង្ស៊ី ចំនួន ២ អាណត្តិ មកហើយ៕
CEN
ដោយ: ដាវុធ
No comments:
Post a Comment