កណ្តាល: ជាលើកទី២ហើយ ដែលច្រាំងស្ទឹងព្រែកត្នោតរងការបាក់ស្រុតចូលក្នុងស្ទឹង បន្ទាប់ពីធ្វើមិនបានមួយឆ្នាំផង។ ការស្ថាបនាជញ្ជាំងបេតុងនៅច្រាំងស្ទឹងព្រែកត្នោតដំណាក់កាលចុងក្រោយ ចាប់ពីគល់ស្ពានតាខ្មៅថ្មី រហូតដល់មាត់ទន្លេបាសាក់នោះ គឺអស់លុយជាង២០ម៉ឺនដុល្លារ ហើយមកដល់ពេលនេះច្រាំងស្ទឹងបានបាក់ស្រុត ហើយលុយថ្លៃស្ថាបនានោះទៀតសោត ក៏មិនប្រគល់ទទួលជូនក្រុមហ៊ុនផងដែរ គឺបានន័យថា កូនកើតមកមិនទាន់ចេះដើរ ស្រាប់តែឈឺស្លាប់ទៅហើយ។
ការស្ថាបនាច្រាំងបេតុងនោះបានធ្លាក់ចូលទឹកស្ទឹងព្រែកត្នោត ដោយសារតែការស្ថាបនាច្រាំងដងស្ទឹងព្រែកត្នោត ស្ថិតនៅទីក្រុងតាខ្មៅ ខេត្តកណ្ដាល គ្មានបទដ្ឋានបច្ចេកទេស ធ្វើឲ្យច្រាំងបេតុងទើបស្ថាបនារួច ធ្លាក់ទៅតាមទឹកពេលទឹកស្រក។
មន្ត្រីខេត្តខេត្តកណ្តាលម្នាក់បាននិយាយថា អ្នកស្ថាបនាច្រាំងស្ទឹងនេះ អនុវត្តដោយប្រធានសុរិយោដីខេត្តកណ្ដាល។ គាត់ជាអ្នកម៉ៅការ ស្ថាបនាធ្វើទាំងអស់ដោយអស់ ទឹកប្រាក់ជាង២៥ម៉ឺនដុល្លារ។ ឮថា មិនទាន់បើកលុយផង ស្រាប់តែបាក់ច្រាំងតាមដងស្ទឹងព្រែកត្នោតនេះ ទាំងផ្ទាំងៗ តែរយៈពេលប៉ុន្មនានថ្ងៃនេះ គេឃើញអ្នកម៉ៅការ ចុះទៅធ្វើការជួសជុលស្ថាបនាឡើងវិញ ផ្នែកខាងលើ។
ចាំមើលៗ តើការចុះទៅស្ថាបនាថ្មីឡើងវិញនេះ វាមានគុណភាពឬយ៉ាងណា? ឬឆាប់ខូចដូចដើមទៀត?។ មានការរិះពីមហាជនថា នេះមកពីអ្នកម៉ៅការស្ថាបនាស៊ីកិបកេង នៅក្នុងគម្រោងច្រើនពេក គួបផ្សំធ្វើខ្វះគុណភាព ពោលគឺចាក់ស្ដើងស៊ីក្រាស់។
លោកហេង ធៀម អភិបាលក្រុងតាខ្មៅ បាននិយាយប្រាប់ភ្នំពេញរីផតធើថា "ចំពោះគម្រោងនៃការស្ថាបនាច្រាំងបេតុង ដងស្ទឹងព្រែកត្នោតនេះ មិនទាន់បានធ្វើពិធីប្រគល់ទទួលផង ស្រាប់តែបាក់ចូលទឹកទាំងផ្ទាំង តែម្ដង គួរឲ្យខ្មាសគេណាស់"។
គួរបញ្ជាក់ផងដែរថា ជញ្ជាំងបេតុងស្ទឹងព្រែកត្នោតនេះ បានស្ថាបនាដើម្បីឲ្យមានសោភ័ណភាពល្អស្រស់ស្អាត សម្រាប់ទុកឲ្យប្រជាពលរដ្ឋមកលម្អែកម្សាន្តសប្បាយ ប៉ុន្តែគួរសោកស្តាយច្រាំងស្ទឹងបានបាក់ស្រុតទៅហើយ បើទោះបីជាមានការជួសជុលឡើងវិញក៏ដោយ ក៏ទំនុកចិត្តរបស់ប្រជាពលរដ្ឋត្រូវបានរលាយអស់ហើយ ហើយមិនហ៊ានដើរពីលើដែរ ព្រោះខ្លាចបាក់ស្រុតយកពួកគាត់ចូលទៅក្នុងស្ទឹងតែម្តង។ ការស្ថាបនាច្រាំងស្ទឹងនេះ កាលពីបីឆ្នាំមុនក៏បានបាក់ស្រុតម្តងរួចមកហើយ ហើយក៏មានការស្ថាបនាឲ្យល្អឡើងវិញផងដែរ។ នេះជាការខ្ជះខ្ជាយខាតថវិកាជាតិ ក្នុងការស្ថាបនាអ្វីមួយ ធ្វើហើយខូចហើយត្រូវធ្វើឡើងវិញ នៅតែកន្លែងដដែល ដែលគ្មានបទដ្ឋានបច្ចេកទេសច្បាស់លាស់នោះ។
លោក បានបន្តទៀតថា មូលហេតុបណ្ដាលឲ្យ បាក់ច្រាំងដងស្ទឹងព្រែកត្នោតនេះ អាចបណ្ដាលទឹកជំនន់វាហូរច្រោះ៕
CEN
ដោយ: ដាវុធ
No comments:
Post a Comment