សៀមរាប ៖ ក្រុមឈ្មួញជីកដីលក់ប្រមាណជា១០នាក់ បាននាំគ្នាសម្រុកជីកយកអាចម៍ និងដឹកដោយសេរី នៅតំបន់ហាមឃាត់ នៃព្រៃលិចទឹកត្រង់ចំណុចខាងជើងភ្នំក្រោម ក្នុងសង្កាត់សៀមរាប សង្កាត់ស្វាយដង្គំ និងសង្កាត់សំបួរ នៃក្រុងសៀមរាបដែលករណីនេះ ត្រូវបានគេដាក់ការសង្ស័យថា អាជ្ញាធរពាក់ព័ន្ធនៅទីនោះ ឃុបឃិតឲ្យមានការប្រព្រឹត្តបទល្មើស បំផ្លាញធនធានធម្មជាតិទាំងនេះ។
យោងតាមប្រភពបានឲ្យដឹងថា សកម្មភាពជីកកាយយកអាចម៍ដីលក់នេះ កើតមានជាយូរខែឆ្នាំមកហើយ នៅភូមិសាស្ត្រ សង្កាត់សំបួរ សង្កាត់សៀមរាប និងស្វាយដង្គំ នៃក្រុងសៀមរាប ដោយគេបានដាក់ការសង្ស័យថា អាជ្ញាធរនិងជំនាញពាក់ព័ន្ធឃុបឃិតបើកភ្លើងខៀវជាថ្នូរ និងប្រាក់យ៉ាងច្រើនសន្ធឹកសន្ធាប់ ដើម្បីបិទមាត់មិនបង្ក្រាប។ ប្រភពបន្តថា ជារឿយៗពលរដ្ឋតែងតែតវ៉ាបិទផ្លូវ ខណៈក្រុមហ៊ុនទាំងនោះបានដឹកដីហុយ និងខូចផ្លូវសាធារណៈ។
ប្រភពបន្តថា មិនដឹងដល់ពេលណាទើបអាជ្ញាធរភ្ញាក់ខ្លួន និងមានវិធានការនោះទេ ហើយបើទុកអញ្ចឹងមុខជារលាយព្រៃលិចទឹកអស់ហើយ មិនត្រឹមតែប៉ុណ្ណោះផលត្រីនឹងអាចថយចុះ ជាបន្តបន្ទាប់ជាមិនខាន។ ប្រភពបន្ថែមថា ឈ្មួញដែលកំពុងកាយដីនៅតំបន់នោះមាន៣នាក់ គឺទី១. ឈ្មោះ យ៉ុង ទី.២ ឈ្មោះឆង ទី.៣ ឈ្មោះ គង់។ ជុំវិញកាលើកឡើងខាងលើនេះដែរលោក សូ ប្លាតុង អភិបាលក្រុងសៀមរាប មិនអាចទាក់ទងសុំការពន្យល់បានទេ នៅព្រឹកថ្ងៃទី១៣ ខែមករា ឆ្នាំ២០១៧នេះ ដោយទូរស័ព្ទរបស់លោកគ្មានអ្នកទទួល។
ចំណែកអស់លោកជំនាញរដ្ឋបាលជលផលខេត្តសៀមរាប ហាក់នៅព្រងើយកន្តើយមិនអើពើសោះឡើយ ហើយទង្វើទាំងអស់នេះធ្វើឲ្យមហាជន ងឿងឆ្ងល់យ៉ាងខ្លាំង។
គួរកត់សម្គាល់ផងដែរថា មន្ត្រីរាជការនៅក្នុងខេត្តសៀមរាប ដែលមានតួនាទី និងការទទួលខុសត្រូវចំពោះការងារ ដែលថ្នាក់លើចាត់តាំងមក ហាក់ដូចជាមានការឆកល្វែងយ៉ាងខ្លាំង បន្ទាប់ពីគេឃើញមានអាជ្ញាធរខេត្តមួយនេះ មានភាពកម្សោយ ចាប់ពីថ្នាក់ក្រោមរហូតដល់ថ្នាក់លើ គឺមិនសូវអើពើរឿងបង្ក្រាបបទល្មើស ក្នុងតំបន់ព្រៃលិចទឹកនោះទេ ដោយបណ្ដែតបណ្ដោយឲ្យមានការនេសាទខុសច្បាប់ និងកាប់បំផ្លាញព្រៃលិចទឹក ដែលជាជម្រកត្រីពងកូនជាដើម និងជាពិសេសពួកគេបានបំផ្លាញហេដ្ឋារចនាសម្ព័ន្ធនានា ក្នុងខេត្តយ៉ាងគំហុកផងដែរ៕
កម្ពុជាថ្មី
No comments:
Post a Comment