ភ្នំពេញ: រដ្ឋបាលសាលារាជធានីភ្នំពេញ បានជូនដំណឹង ស្តីពីការចល័តយោធភណ្ឌ របស់កងយោធពលខេមរភូមិន្ទ នៅថ្ងៃទី៥ និងថ្ងៃទី៩ ខែមករា ឆ្នាំ២០១៧ ក្នុងភូមិសាស្ត្ររាជធានីភ្នំពេញ។ នៅវេលាម៉ោង ២ ទៀបភ្លឺ ថ្ងៃទី៥ ខែមករា មានរថពាសដែក ចំនួន២គ្រឿង និងរថយន្តយោធា ចំនួន១៥គ្រឿង ចេញពីកងពលតូច អន្តរាគមន៍លេខ៧០ ឆ្ពោះទៅមជ្ឈមណ្ឌលសន្និបាត និងពិព័រណ៍កោះពេជ្រ និងនៅថ្ងៃទី៩ ខែមករា ចេញពីកោះពេជ្រ ទៅកងពលតូចអន្តរាគមន៍ លេខ៧០វិញ។
នៅក្នុងសេចក្តីជូនដំណឹង របស់រដ្ឋបាល រាជធានីភ្នំពេញ កាលពីថ្ងៃទី៤ ខែមករា លោកប៉ា សុជាតិវង្ស អភិបាលរាជធានីភ្នំពេញ បានថ្លែងថា គណៈកម្មការរៀបចំកីឡា កងយោធពលខេមរភូមិន្ទ នឹងរៀបចំកម្មវិធីប្រកួតកីឡា កងយោធពលខេមរភូមិន្ទ អបអរសាទរទិវា ៧មករា និងប្រមូលមូលនិធិគាំទ្រ សកម្មភាពសមាគមអតីតយុទ្ធជនកម្ពុជា នាថ្ងៃទី៦-៨ ខែមករា ឆ្នាំ២០១៦ នៅមជ្ឈមណ្ឌលសន្និបាត និងពិព័រណ៍កោះពេជ្រ។
ក្នុងកម្មវិធីមានការតាំងពិព័រណ៍យោធភណ្ឌ នៃកងយោធពលខេមរភូមិន្ទ គណៈកម្មការរៀបចំ និងធ្វើការចល័តសម្ភារៈ បម្រើការងារយោធា មួយចំនួន រួមមាន រថពាសដែក ចំនួន២គ្រឿង និងរថយន្តយោធា ចំនួន១៥គ្រឿង នៅវេលាម៉ោង ២ ទៀបភ្លឺ ថ្ងៃទី៥ ខែមករា ឆ្នាំ២០១៧ ដោយចេញពីកងពលតូច អន្តរាគមន៍លេខ៧០ ឆ្ពោះទៅមជ្ឈមណ្ឌលសន្និបាត និងពិព័រណ៍កោះពេជ្រ ដោយឆ្លងកាត់កំណាត់ ផ្លូវជាតិលេខ៣ ផ្លូវវេងស្រេង មហាវិថីមុនីរ៉េត មហាវិថីម៉ៅសេទុង និងមហាវិថីសុធារស ហើយត្រឡប់ចូល កងពលតូចអន្តរាគមន៍ លេខ៧០ វិញ នៅថ្ងៃទី៩ ខែមករា ឆ្នាំ២០១៧ វេលាម៉ោង ២ ទៀបភ្លឺ។
លោកអភិបាលរាជធានីភ្នំពេញ សូមកុំឲ្យប្រជាពលរដ្ឋ មានការយល់ច្រឡំ និងភ្ញាក់ផ្អើល ចំពោះការចល័តយោធភណ្ឌ សម្រាប់រៀបចំ កម្មវិធីតាំងពិព័រណ៍ សម្ភារៈយោធាខាងលើនេះ។
គណៈកម្មការរៀបចំការប្រកួតកីឡា កងយោធពលខេមរភូមិន្ទ ឆ្នាំ២០១៧ បានឲ្យដឹងថា កម្មវិធីលំអិត មានដូចជាៈ ១-ថ្ងៃទី៥ ខែមករា ឆ្នាំ២០១៧ វេលាម៉ោង ៨ ព្រឹក ពិធីក្រុងពាលី ក្នុងការរៀបចំកីឡាកីឡា កងយោធពលខេមរភូមិន្ទ ឆ្នាំ២០១៧។ ២-ថ្ងៃទី៦ ខែមករា ឆ្នាំ២០១៧ វេលាម៉ោង ៥ ល្ងាច កម្មវិធីប្រគំតន្ត្រី និងការតាំងពិព័រណ៍។ ៣-ថ្ងៃទី៧ ខែមករា ឆ្នាំ២០១៧ វេលាម៉ោង ៥:៣០ ល្ងាច កម្មវិធីប្រគំតន្ត្រី និងការតាំងពិព័រណ៍។ ៤-ថ្ងៃទី៨ ខែមករា ឆ្នាំ២០១៧ វេលាម៉ោង ៦ព្រឹក កម្មវិធីកីឡាកងយោធពលខេមរភូមិន្ទឆ្នាំ២០១៧ ជាផ្លូវការចាប់ផ្តើម។ ៥-ថ្ងៃទី៨ ខែមករា ឆ្នាំ២០១៧ វេលាម៉ោង៥:៣០ ល្ងាច កម្មវិធីប្រគំតន្ត្រី និងការតាំងពិព័រណ៍។
សូមបញ្ជាក់ថា ការប្រកួតកីឡា កងយោធពលខេមរភូមិន្ទ ឆ្នាំ២០១៧ (ការប្រកួតកីឡាកងទ័ព) គឺជាព្រឹត្តិការណ៍ធំមួយ ដែលត្រូវបានរៀបចំឡើង ក្នុងគោលបំណងសំខាន់ៗ រំលឹកខួបអនុស្សាវរីយ៍ ទិវាបុណ្យជាតិ ៧ មករា ១៩៧៩ - ៧ មករា ២០១៧ និងប្រមូលមូលនិធិ ដើម្បីគាំទ្រសកម្មភាព សមាគមអតីតយុទ្ធជនកម្ពុជា។ លើសពីនេះ ព្រឹត្តិការណ៍នេះ នឹងបង្ហាញដល់សាធារណជន និងមហាជន ស្វែងយល់ និងយល់ដឹងបន្ថែមទៀត អំពីតួនាទី និងភារកិច្ចរបស់កងទ័ព ក្នុងការចូលរួមថែរក្សា សុខសន្តិភាព និងការអភិវឌ្ឍប្រទេសជាតិ។ បន្ថែមពីនេះទៀត បង្កលក្ខណៈឱ្យមហាជន ចូលរួមកាន់តែជិតស្និទ្ធ ជាមួយនឹងកងទ័ព៕
CEN
ដោយ: មុនីរាជ
No comments:
Post a Comment