ភ្នំពេញ ៖ យោងតាមការបញ្ជាក់របស់គេហទំព័រ ក្រសួងធនធានទឹក បានឲ្យដឹងថា គម្រោងអភិវឌ្ឍន៍ធនធានទឹក ស្ទឹងស្រែង ជំហានទី ២ ដែលមាន សក្ដានុពល ផ្គត់ផ្គងទឹក លើខេត្តឧត្តរមានជ័យ បន្ទាយមានជ័យ និងខេត្តសៀមរាប គិតមកដល់ពេលនេះ សម្រេចការងារបានប្រមាណ ៩៩% ហើយ។
ក្រសួងបន្តថា បន្ទាប់ពីបានបញ្ចប់ការអនុវត្តជំហានទី ១ ដោយជោគជ័យរួចមក ក្រសួង ធនធានទឹក និងឧតុនិយម កំពុង អនុវត្តគម្រោងអភិវឌ្ឍន៍ធនធានទឹក ស្ទឹងស្រែង ជំហានទី ២ ស្ថិតនៅក្នុងភូមិស្រះកែវ ឃុំពង្រ ស្រុកចុងកាល់ ខេត្តឧត្តរមានជ័យ ដោយបានសាងសង់សម្រេច ប្រមាណ ៩៩% ហើយ ដែលគ្រោងនឹងបញ្ចប់សាងសង់នៅអំឡុងខែមីនា ឆ្នាំ២០១៧ ខាងមុខនេះ។
ក្រសួង បន្ថែមថា ការងារជាអាទិភាពនៅក្នុងជំហានទី ២ នេះ គឺការសាងសង់ទំនប់អាងទឹក ប្រវែង ២.៨០០ ម៉ែត្រ តភ្ជាប់ពីភ្នំមួយទៅភ្នំមួយ (ភ្នំកំបោរ ទៅភ្នំរូងដែក) ដែលមានសមត្ថភាពស្តុកទឹកបាន ២៥៨ លានម៉ែត្រគូប ។ ក្រោយពេលសាងសង់ជំហានទី ២ រួចរាល់ជាស្ថាពរ នៅអំឡុងខែមីនា ឆ្នាំ ២០១៧ ខាងមុខនេះ គម្រោងអភិវឌ្ឍន៍ធនធានទឹក ស្ទឹងស្រែង នឹងផ្តល់ទឹកសម្រាប់យកទៅផ្គត់ផ្គង់ដីស្រែ ជាង ២៥.០០០ ហិកតា ក្នុងខេត្តចំនួន ៣ គឺខេត្តឧត្តរមានជ័យ បន្ទាយមានជ័យ និងខេត្តសៀមរាប។ ទន្ទឹមនឹងនោះ គម្រោងនេះ ក៏នឹងដើរតួនាទីកាត់បន្ថយទឹកជំនន់ និងផ្តល់ទឹកសម្រាប់ការប្រើប្រាស់ប្រចាំថ្ងៃដល់បងប្អូនប្រជាពលរដ្ឋក្នុងតំបន់ផងដែរ៕
កម្ពុជាថ្មី
ឌួងវិរះជ័យ
No comments:
Post a Comment