ភ្នំពេញ: សម្តេចនាយករដ្ឋមន្ត្រី ហ៊ុន សែន និងជាប្រមុខដឹកនាំ គណបក្សប្រជាជនកម្ពុជា បានបញ្ជាក់ថា បើយន្តការ ដែលទើបបង្កើតឡើង តាមរយៈប្រការ ៤៨ ថ្មី (បី) នៃបទបញ្ជាផ្ទៃក្នុងរដ្ឋសភា ពិបាកក្នុងការធ្វើការ រួមទាំងប៉ុនប៉ងចរចាដោះលែងអ្នកទោស ដែលបំពានដល់ អំណាចតុលាការផងនោះ សម្តេចសម្រេចស្នើ ឲ្យធ្វើវិសោធនកម្ម បទបញ្ជាផ្ទៃក្នុងរដ្ឋសភា ដើម្បីលុបចោល “ប្រធានក្រុមមតិភាគតិច និងប្រធានក្រុម ថ្នាក់ដឹកនាំតំណាងរាស្ត្រ”។
បើយោងតាមប្រសាសន៍ សម្តេចតេជោ ហ៊ុន សែន ប្រាប់កាសែតក្នុងស្រុក ចេញពីទីក្រុង Zurich ប្រទេសស្វីស កាលពីថ្ងៃទី១៦ ខែមករាថា “បើយន្តការ ដែលទើបបង្កើតឡើង តាមរយៈប្រការ ៤៨ ថ្មី (បី) វាពិបាកធ្វើការដោយ រួមទាំងការប៉ុនប៉ងប្រើប្រាស់វា ដើម្បីចរចាដោះលែងអ្នកទោស ដែលបំពានដល់ អំណាចតុលាការផងនោះ យើងត្រូវតែធ្វើវិសោធនកម្ម ប្រការ៤៨ថ្មី (បី) ហើយវិលទៅប្រើប្រការ ៤៨ (ពីរ) នៃបទបញ្ជាផ្ទៃក្នុងនៃរដ្ឋសភាវិញ។ ដោយសារប្រការ ៤៨ថ្មី (បី) ជាគំនិតផ្តួចផ្តើមរបស់ខ្ញុំ ទើបខ្ញុំស្នើសុំឲ្យធ្វើការកែប្រែ តាមរយៈ សមាជិកសភា គណបក្សប្រជាជនកម្ពុជា និងគណបក្សប្រជាជនកម្ពុជាវិញ។ ធ្វើដូចនេះឆាប់ចប់រឿង ព្រោះមិនបាច់ពិបាក រៀបចំរបៀបវារៈ នៃការប្រជុំទៀតទេ ព្រោះយន្តការនោះ វារលាយបាត់ តាមរយៈវិសោធនកម្ម ដែលនឹងត្រូវធ្វើរួចទៅហើយ”។
សូមជម្រាបថា មាត្រា៨២ ថ្មី ជំពូក៦ នៃបទបញ្ជាផ្ទៃក្នុង នៃរដ្ឋសភា បានចែងយ៉ាងថា “បទបញ្ជាផ្ទៃក្នុងនេះ នឹងកែប្រែបាន លុះត្រាតែមានសេចក្តីស្នើសុំពី តំណាងរាស្ត្រមួយភាគ ៤ យ៉ាងតិច នៃចំនួនសមាជិក រដ្ឋសភាទាំងមូល ហើយត្រូវបានអនុម័ត យល់ព្រមដោយសំឡេង ភាគច្រើនដាច់ខាត នៃចំនួនសមាជិករដ្ឋសភា ទាំងមូល”។
ទោះបីជាមិនមានការគាំទ្រដោយ តំណាងរាស្ត្រ គណបក្សប្រឆាំងទាំង ៥៥ រូប ក៏គណបក្សប្រជាជនកម្ពុជា ដែលមាន ៦៨ សំឡេង នៅក្នុងរដ្ឋសភា អាចកែប្រែច្បាប់ ស្តីពីបទបញ្ជាផ្ទៃក្នុង ដោយងាយ ដោយសារតែសំឡេងភាគច្រើនដាច់ខាត ឬ ៥០បូកមួយ ត្រូវការសំឡេងតំណាងរាស្ត្រ ត្រឹមតែ ៦២ រូបប៉ុណ្ណោះ ចំណែកគណបក្សប្រជាជនកម្ពុជា មានសំឡេង នៅក្នុងសភារហូតដល់ ៦៨ រូប។
លោក កឹម សុខា អនុប្រធានគណបក្សសង្គ្រោះជាតិ បានថ្លែងប្រាប់អ្នកគាំទ្រ គណបក្សសង្គ្រោះជាតិ ក្នុងប្រទេសបារាំង កាលពីយប់ថ្ងៃទី១៥ ខែមករា តាមរយៈ video conference ថា គណបក្សសង្គ្រោះជាតិ និងគណបក្សប្រជាជនកម្ពុជា អាចនឹងជួបគ្នា ក្នុងសប្តាហ៍ក្រោយនេះ។ គណបក្សទាំងពីរ ក៏បានឆ្លើយឆ្លងគ្នា ទៅវិញទៅមក ដើម្បីកំណត់ពីរបៀបវារៈ នៃកិច្ចពិភាក្សាផងដែរ។
លោកបានបញ្ជាក់ថា គណបក្សប្រជាជនកម្ពុជា តំណាងដោយសម្ដេចក្រឡាហោម ស ខេង បានផ្ញើរបៀបវារៈពីរ មកឲ្យគណបក្សសង្គ្រោះជាតិ ដែលរបៀបវារៈទាំងពីរនោះ រួមមានការពិភាក្សាគ្នា ពីភារកិច្ចរបស់ថ្នាក់ដឹកនាំ គណបក្សទាំងពីរ និងបញ្ហាផ្សេងៗទៀត ពាក់ព័ន្ធនឹងសិទ្ធិសមត្ថកិច្ច របស់ថ្នាក់ដឹកនាំ តំណាងរាស្ត្រគណបក្សទាំងពីរ។ គណបក្សសង្គ្រោះជាតិ មិនជំទាស់ និងរបៀបវារៈទាំងពីរ ដែលស្នើដោយ គណបក្សប្រជាជនកម្ពុជានោះទេ។
លោក កឹម សុខា បានបន្តថា ចំពោះគណបក្សសង្គ្រោះជាតិ វិញ ក៏បានដាក់ស្នើរបៀវារៈចំនួនពីរដែរ គឺការពិភាក្សាគ្នា ពីលទ្ធភាព ក្នុងការធ្វើវិសោធនកម្ម ច្បាប់បោះឆ្នោត ដើម្បីឲ្យពលរដ្ឋខ្មែរ ចំណាកស្រុក ធ្វើការក្រៅប្រទេស អាចបោះឆ្នោតបាន នៅឆ្នាំ២០១៨ ខាងមុខ និងការពិភាក្សាពី បរិយាកាសនយោបាយ មុនការបោះឆ្នោត។
ទាក់ទងជំនួបចរចា រវាងលោក កឹម សុខា ប្រធានក្រុមតិភាគតិច ជាមួយសម្តេចក្រឡាហោម ស ខេង ប្រធានក្រុមមតិភាគច្រើន នៅក្នុងរដ្ឋសភា គឺនៅមិនទាន់បានកំណត់ ថ្ងៃជួបគ្នានៅឡើយទេ៕
CEN
ដោយ: មុនីរាជ
No comments:
Post a Comment