ក្រៅពីកោះហៅមន្ត្រីទូតរដ្ឋសមាជិកក្រុមប្រឹក្សាសន្តិសុខ (UNSC) មកសួរនាំ លោក បេនចាមិន នេតាន់យ៉ាហ៊ូ បានប្រកាសផ្តាច់ជំនួយសម្រាប់អង្គការសហប្រជាជាតិដែលមានទំហំជាង ៧លានដុល្លារ។ នេះជាការសងសឹងរបស់អ៊ីស្រាអែលសម្រាប់ការអនុម័តដំណោះស្រាយប្រឆាំងខ្លួនពាក់ព័ន្ធបញ្ហាប៉ាឡេស្ទីន។
នាយករដ្ឋមន្ត្រីអ៊ីស្រាអែលលោក បេនចាមិន នេតាន់យ៉ាហ៊ូ (Benjamin Netanyahu)បានប្រកាសផ្តាច់ជំនួយដែលអ៊ីស្រាអែលផ្តល់ឲ្យស្ថាប័ននានារបស់អង្គការសហប្រជាជាតិដើម្បីឆ្លើយតបការអនុម័តដំណោះស្រាយដែលទាមទារឲ្យខ្លួនឈប់ឈ្លានពានប៉ាឡេស្ទីន។
លោក នេតាន់យ៉ាហ៊ូបានបញ្ជាក់ច្បាស់ថា លោកបានសម្រេចបញ្ចប់ជំនួយមានទំហំ ៧,៨ លានដុល្លារអាមេរិកដែលផ្តល់ឲ្យស្ថាប័នអង្គការសហប្រជាជាតិចំនួន ៥នោះ ហើយលោកចាត់ទុកថា អង្គការអន្តរជាតិនេះបង្កអរិភាពជាមួយនឹងខ្លួនថែមទៀតផង។
នាយករដ្ឋមន្ត្រីអ៊ីស្រាអែល បេនចាមិន នេតាន់យ៉ាហ៊ូ បានប្រកាសដូច្នេះនៅថ្ងៃសៅរ៍សប្តាហ៍មុន។ ក្នុងថ្ងៃដដែលនោះនាយករដ្ឋមន្ត្រីខាងលើបានបញ្ជឲ្យមន្ត្រីក្រោមឱវាទកាត់បន្ថយទំនាក់ទំនងការទូតនិងសេដ្ឋកិច្ចជាមួយប្រទេសដែលសមាជិកក្រុមប្រឹក្សាសន្តិសុខផងដែរ ដើម្បីជាការព្រមាន។
ការប្រកាសបែបនេះធ្វើឡើងមួយថ្ងៃប៉ុណ្ណោះក្រោយ សមាជិកក្រុមប្រឹក្សាសន្តិសុខអនុម័តដំណោះស្រាយដែលស្នើឡើងដោយម៉ាឡេស៊ី , សេណេហ្កាល់,ណូវែលសេឡង់ និងវេណេហ្ស៊ុយអេឡា ដែលទាមទារឲ្យអ៊ីស្រាអែលបញ្ឈប់ជាប្រញាប់នូវការសង់លំនៅដ្ឋានខុសច្បាប់លើដីប៉ាឡេស្ទីន។
ដើមឡើយ អេហ្ស៊ីបជាអ្នកព្រាងដំណោះស្រាយនេះ ប៉ុន្តែរដ្ឋមួយនេះសុខចិត្តដកមកវិញក្រោយប្រធានាធិបតីទើបជាប់ឆ្នោតទូរសព្ទទៅសួរនាំ និងស្នើឲ្យដកដំណោះស្រាយនេះចេញ។ អេហ្ស៊ីបមិនខ្វល់ពីរដ្ឋបាលអូបាម៉ាឡើយ ព្រោះ ដូណាល់ ត្រាំ ឯណោះទេនឹងត្រូវដឹកនាំអាមេរិកក្នុងរយៈពេល ៤ឆ្នាំទៅមុខយ៉ាងតិច។ ហើយសម្រាប់អេហ្ស៊ីប ប៉ាឡេស្ទីនក៏មិនមានតម្លៃអ្វីច្រើនដូចអ៊ីស្រាអែលដែរ។ ដូច្នេះ ដកដំណោះស្រាយចេញដើម្បីកុំឲ្យមានរឿងហ្មងសៅទៅថ្ងៃមុខ។ ក្រោយអេហ្ស៊ីបដកសេចក្តីព្រាងដំណោះស្រាយដើមចេញ ប្រទេសទាំងបួនខាងលើក៏ដាក់សេចក្តីព្រាងដំណោះស្រាយក្នុងរបៀបវារៈកិច្ចប្រជុំតែម្តង៕
ថ្មីៗ
អត្ថបទ : សៅ ផលនិស្ស័យ
No comments:
Post a Comment