ថ្ងៃពុធទី ២៨ ធ្នូ រដ្ឋាភិបាលអ៊ីស្រាអែលត្រៀមចាប់ផ្តើមពិភាក្សាគ្នាពីការអនុញ្ញាតឲ្យមានការសង់សង់ផ្ទះប្រហែល ៦១៨ខ្នងបន្ថែមទៀតក្នុងទឹកដីប៉ាឡេស្ទីននាភាគខាងកើតក្រុងហ្ស៊េរុយសាឡិម។ វាជាការផ្គើនដំណោះស្រាយក្រុមប្រឹក្សាសន្តិសុខអង្គការសហប្រជាជាតិដែលទាមទារឲ្យអ៊ីស្រាអែលបញ្ឈប់សកម្មភាពបំពានទឹកដីប៉ាឡេស្ទីន។
អ៊ីស្រាអែលចាប់ផ្តើមផ្គើនអង្គការសហប្រជាជាតិ និងសហគមន៍អន្តរជាតិកាន់តែខ្លាំងដោយចាប់ផ្តើមគម្រោងសង់ផ្ទះបន្ថែមលើដីប៉ាឡេស្ទីន ដោយមិនខ្លាចរអាច្បាប់អន្តរជាតិ ទោះក្រុមប្រឹក្សាសន្តិសុខអង្គការសហប្រជាជាតិអនុម័តដំណោះស្រាយទាមទារឲ្យខ្លួនឈប់រំលោភដីប៉ាឡេស្ទីនក៏ដោយចុះ។
យោងតាមក្រុមអង្គការឃ្លាំមើលការសង់សំណង់ Amim គណៈកម្មការផែនការអ៊ីស្រាអែលត្រៀមជួបប្រជុំពិភាក្សាគ្នានៅថ្ងៃពុធទី ២៨ ធ្នូ ដើម្បីអនុញ្ញាតឲ្យមានការសាងសង់ផ្ទះចំនួន ៦១៨ កន្លែងបន្ថែមនៅលើទឹកដីភាគខាងកើតនៃក្រុងហ្ស៊េរុយសាឡិម
យោងទីភ្នាក់ងារព័ត៌មាន AFP អភិបាលរងក្រុងហ្ស៊េរុយសាឡិម Meir Turjeman ដែលជាប្រធានគណៈកម្មការនេះ បានបញ្ជាក់ថា ក្រុមការងារលោកគ្មានផែនការលុបចោលកិច្ចប្រជុំនោះ ដើម្បីឆ្លើយតបនឹងដំណោះស្រាយក្រុមប្រឹក្សាសន្តិសុខអង្គការសហប្រជាជាតិឡើយ។ ប្រធានគណៈកម្មការរូបនេះបានបញ្ជាក់បន្ថែមថា អ៊ីស្រាអែលគម្រោងនឹងសង់សំណង់ផ្ទះឲ្យបាន ៥៦០០ ខ្នង នៅក្នុងជំហានដំបូង។
តាមពិតទៅ ក្រុមប្រឹក្សាសន្តិសុខអនុម័តដំណោះស្រាយទាមទារឲ្យអ៊ីស្រាអែលបញ្ឈប់សំណង់លំនៅដ្ឋាននិងរំលោភបំពានដីប៉ាឡេស្ទីនកាលពីថ្ងៃសុក្រ ដោយអាមេរិកដែលជាសម្ព័ន្ធមិត្តអ៊ីស្រាអែលបោះឆ្នោតអនុបវាទ។ ដំណោះស្រាយនេះបានធ្វើឲ្យអ៊ីស្រាអែលខឹងសម្បារជាខ្លាំងរហូតដល់ផ្តាច់ជំនួយហិរញ្ញវត្ថុដែលផ្តល់ឲ្យអង្គការសហប្រជាជាតិថែមទៀតនេះ។
មិនត្រឹមតែប៉ុណ្ណោះ អ៊ីស្រាអែលបានធ្វើសង្គ្រាមការទូតដល់ជាការសងសឹកចំពោះប្រទេសដែលបោះឆ្នោតគាំទ្រដោះស្រាយថែមទៀតផង។ ភ្លាមៗក្រោយការបោះឆ្នោត អ៊ីស្រាអែលកោះហៅមន្ត្រីទូតរដ្ឋសមាជិកក្រុមប្រឹក្សា មកសួរនាំ ហើយនាយករដ្ឋមន្ត្រីអ៊ីស្រាអែលលោក បេនចាមិន នេតាន់យ៉ាហ៊ូ បានបញ្ជាឲ្យមន្ត្រីខ្លួនកាត់បន្ថយទំនាក់ទំនងការទូតនិងសេដ្ឋកិច្ចជាមួយប្រទេសទាំងអស់នោះថែមទៀតផង៕
ថ្មីៗ
អត្ថបទ : ថ្មីៗ
No comments:
Post a Comment