ភ្នំពេញ: លោក Hidehisa HORINOUCHI ឯកអគ្គរដ្ឋទូតជប៉ុន ប្រចាំកម្ពុជា បានបញ្ជាក់ថា នឹងខិតខំដើម្បីជំរុញ អ្នកវិនិយោគជប៉ុន មកកាន់ប្រទេសកម្ពុជា ឲ្យកាន់តែច្រើន ហើយជប៉ុន កំពុងត្រៀមរៀបចំ បើកការិយាល័យ កុងស៊ុលនៅខេត្តសៀមរាប នឹងធ្វើឲ្យបង្កើនថែមទៀត នូវភ្ញៀវទេសចរណ៏ ជប៉ុនមកកម្ពុជា បន្ទាប់ពីបើកឲ្យមាន ជើងហោះហើរត្រង់មកកម្ពុជា កាលពីពេលថ្មីៗនេះ ។
ការបញ្ជាក់របស់ឯកអគ្គរដ្ឋទូតជប៉ុន បានធ្វើឡើងនៅក្នុងជំនួបពិភាក្សាជាមួយលោកទេសរដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការ អន្តរជាតិ កាលពីព្រឹកថ្ងៃទី២៧ ខែធ្នូ ឆ្នាំ២០១៦ នៅទីស្តីការ ក្រសួងការបរទេស។
លោក Hidehisa HORINOUCHI ឯកអគ្គរដ្ឋទូតជប៉ុន បានបញ្ជាក់ថា ក្នុងនាមជា ឯកអគ្គរដ្ឋទូតជប៉ុន ប្រចាំកម្ពុជា លោកនឹងខិតខំបន្ថែមទៀត ដើម្បីជំរុញអ្នកវិនិយោគជប៉ុន មកកាន់កម្ពុជា។ ចំពោះផ្នែកទេសចរណ៏ លោកឯកអគ្គរដ្ឋទូត បានបញ្ជាក់ថា ជប៉ុន បាននិងកំពង់ត្រៀម រៀបចំបើកការិយាល័យ កុងស៊ុលនៅខេត្តសៀមរាប ហើយបើកនូវការិយាល័យ កុងស៊ុលរបស់ជប៉ុន នៅខេត្តសៀមរាប នឹងធ្វើឲ្យបង្កើនថែមទៀត នៅភ្ញៀវទេសចរណ៍ជប៉ុន បន្ទាប់ពីបើកឲ្យមានជើងហោះហើរត្រង់ មកកម្ពុជា កាលពីពេលថ្មីៗនេះ ។
ឯកអគ្គរដ្ឋទូតជប៉ុន ក៏បានសាទរ ចំពោះភាពជោគជ័យ នៃការចុះឈ្មោះអ្នកបោះឆ្នោតថ្មី ឆ្នាំ២០១៦ ហើយជប៉ុន នឹងបន្តគាំទ្រ និងផ្តល់នូវការជួយឧបត្ថម្ភ បន្ថែមទៀតលើ ការបោះឆ្នោត នៅកម្ពុជា។
លោក ជុំ សុន្ទរី អ្នកនាំពាក្យ ក្រសួងការបរទេសកម្ពុជា និងសហប្រតិបត្តិការ អន្តរជាតិ បានមានប្រសាសន៍ថា នៅក្នុងជំនួបពិភាក្សានោះ លោកទេសរដ្ឋមន្ត្រី ប្រាក់ សុខុន បានស្វាគមន៏ និងពេញចិត្ត ចំពោះការតែងតាំង ឯកអគ្គរដ្ឋទូតថ្មីនេះ។ នៅក្នុងជំនួបនោះដែរ ឯកអគ្គរដ្ឋទូតជប៉ុន បានរីករាយចំពោះ ការវិវត្តរបស់ប្រទេសកម្ពុជា និងទំនាក់ទំនងដ៏ ល្អប្រសើរ រវាងប្រទេសកម្ពុជា និងជប៉ុន ហើយឯកអគ្គរដ្ឋទូតជប៉ុន ក៏បានរីករាយចំពោះ ការកើនឡើងនៃ អ្នកវិនិយោគជប៉ុននៅកម្ពុជា ដូចជាផ្នែកសាងសង់ មានផ្សារអ៊ីអនមលជាដើម ហើយក៏បានស្វាគមន៍ ចំពោះគំរោងសាសង់ ផ្សារអ៊ីអនមលទី២ នៅភ្នំពេញផងដែរ ដែលបញ្ជាក់ថា ជប៉ុនបានចាប់អារម្មណ៍ ចំពោះការវិនិយោគនៅកម្ពុជា។
អ្នកនាំពាក្យ ក្រសួងការបរទេស បានបន្តថា នៅក្នុងជំនួបពិភាក្សា លោកទេសរដ្ឋមន្ត្រី ប្រាក់ សុខុន ក៏បានជំរាប ឯកអគ្គរដ្ឋទូតជប៉ុន អំពីការរីកចំរើនលើ ផ្នែកសេដ្ឋកិច្ច និងការវិវត្តនៃ ស្ថានការណ៍នៅកម្ពុជា ជាពិសេសការលេចចេញ នូវភាពល្អប្រសើរ ក្នុងរយៈកាលចុងក្រោយនេះ ហើយលោកទេសរដ្ឋមន្ត្រី ក៏បានលើកឡើង ពីការត្រៀមរៀបចំ ការបោះឆ្នោត ឃុំ សង្កាត់ នាឆ្នាំ២០១៧ និងការបោះឆ្នោតសកល នៅឆ្នាំ២០១៨ ខាងមុខនេះ។ ជាពិសេសទៀត លើភាពជោគជ័យ នៃការចុះឈ្មោះអ្នកបោះឆ្នោត ដែលទើបត្រូវបានបញ្ចប់ កាលពីពេលថ្មីៗនេះ ហើយលោកបានអរគុណជប៉ុន ដែលបានផ្តល់ជំនួយ លើការបោះឆ្នោតនេះ។
ជាការឆ្លើយតប ឯកអគ្គរដ្ឋទូតជប៉ុន ក៏បានសាទរចំពោះ ភាពជោគជ័យនៃ ការចុះឈ្មោះអ្នកបោះឆ្នោតថ្មី ឆ្នាំ២០១៦ ហើយជប៉ុននឹងបន្តគាំទ្រ និងផ្តល់នូវការជួយឧបត្ថម្ភ បន្ថែមទៀតលើការបោះឆ្នោតនៅកម្ពុជា៕
CEN
ដោយ: មុនីរាជ
No comments:
Post a Comment