ភ្នំពេញ: លោក ហ៊ីឌីសា ហ៊ីរីណាឈី (Hidehisa HORINOUCHI) ឯកអគ្គរាជទូតជប៉ុន ប្រចាំកម្ពុជា បានស្នើសុំឲ្យសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ជួយធ្វើយ៉ាងណា ថែរក្សាសុវត្ថិភាព ជូនចំពោះធុរជនជប៉ុន ក៏ដូចជា ប្រជាជនជប៉ុន ទាំងអស់ ដែលបានមកកាន់កម្ពុជា។ ការស្នើនេះ បានធ្វើឡើងនៅក្នុង ជំនួបពិភាក្សាជាមួយ សម្តេចក្រឡាហោម ស ខេង កាលពីរសៀលថ្ងៃទី២៧ ខែធ្នូ ឆ្នាំ២០១៦។
សម្តេចក្រឡាហោម ស ខេង បានបញ្ជាក់ថា នឹងបន្តយកចិត្តទុកដាក់ ធ្វើយ៉ាងណារក្សាបាន នូវសុខសុវត្ថិភាព ជូនដល់ធុរជនជប៉ុន និងជនជាតិជប៉ុន ដែលមកកម្ពុជា ក៏ដូចជា ជនជាតិផ្សេងៗទៀត ដែលមកទស្សនកិច្ច នៅកម្ពុជា។
នៅក្នុងជំនួបពិភាក្សា សម្តេចក្រឡាហោម ស ខេង បានស្វាគមន៍ចំពោះ វត្តមានរបស់ ឯកអគ្គរាជទូតជប៉ុនថ្មី ប្រចាំនៅកម្ពុជា ហើយបានថ្លែងអំណរគុណ ដល់រាជរដ្ឋាភិបាលជប៉ុន និងប្រជាជនជប៉ុន ដែលកន្លងមក បានជួយដល់កម្ពុជា ក្នុងបុព្វហេតុ កសាងសុខសន្តិភាព និងការអភិវឌ្ឍ របស់កម្ពុជា នាពេលកន្លងមក។ ជាមួយគ្នានោះ សម្តេចសង្ឃឹមថា ជប៉ុននឹងជួយកម្ពុជា បន្តទៀត ក្នុងដំណើរការអភិវឌ្ឍប្រទេស ទៅថ្ងៃអនាគត។
លោក ហ៊ីឌីសា ហ៊ីរីណាឈី បានមានប្រសាសន៍ថា កម្ពុជា និងជប៉ុន បានក្លាយទៅជាដៃគូ យុទ្ធសាស្ត្រ ចាប់តាំងពីក្រោយ ឆ្នាំ២០១៣ កន្លងមក ហើយចាប់ពីពេលនោះមកគឺ មានវឌ្ឍនភាពជាច្រើន រវាងប្រទេសទាំងពីរ ហើយក៏មានប្រជាជនជប៉ុន និងធុរជនជប៉ុន កាន់តែច្រើនឡើងៗ បន្តមកទស្សនកិច្ច នៅប្រទេសកម្ពុជា។ ជាពិសេសនោះ ក្រោយពីការបង្កើតឲ្យមាន ការហោះហើរត្រង់ពី ជប៉ុនមកកម្ពុជាតែម្តង។
ដោយកំណើនប្រជាជនជប៉ុន និងធុរជនជប៉ុន មកទស្សនកិច្ចកម្ពុជា កាន់តែច្រើន ឯកអគ្គរាជទូតជប៉ុន ក៏បានស្នើសុំឲ្យ សម្តេចក្រឡាហោម ស ខេង ជួយធ្វើយ៉ាងណា ថែរក្សាសុវត្ថិភាព ជូនចំពោះធុរជនជប៉ុន ក៏ដូចជា ប្រជាជនជប៉ុន ទាំងអស់នោះ ដែលបានមកកាន់កម្ពុជា។ លោកសង្ឃឹមថា ចំនួនជនជាតិជប៉ុន នឹងបន្តកើនឡើង មកទស្សនកិច្ចនៅកម្ពុជា។
លោក ហ៊ីឌីសា ហ៊ីរីណាឈី ក៏បានសម្តែងនូវ ការរីករាយចំពោះ ជំនួយផ្សេងៗរបស់ជប៉ុន មកកម្ពុជា រួមទាំងការកសាង ហេដ្ឋារចនាសម្ព័ន្ធ ការដោះមីន និងការជួយដល់ ដំណើរការចុះឈ្មោះបោះឆ្នោត និងការងារផ្សេងៗទៀត ដែលជប៉ុនជួយដល់ រាជរដ្ឋាភិបាលកម្ពុជា។
ឆ្លើយតបទៅនឹងការសុំ ឲ្យជួយថែរក្សាសុវត្ថិភាព ជូនដល់ធុរជនជប៉ុន និងប្រជាជនជប៉ុន សម្តេចក្រឡាហោម ស ខេង បានមានប្រសាសន៍ថា ស្ថានភាពសន្តិសុខ នៅកម្ពុជា គឺមានភាពល្អប្រសើរឡើង ដោយសារការបង្ក្រាបបទល្មើស មានការថយចុះ ហើយសម្តេច នឹងបន្តយកចិត្តទុកដាក់ ធ្វើយ៉ាងណា រក្សាបាននូវសុខសុវត្ថិភាព ជូនដល់ធុរជនជប៉ុន និងជនជាតិជប៉ុន ដែលមកកម្ពុជា ក៏ដូចជា ជនជាតិផ្សេងៗទៀត ដែលមកទស្សនកិច្ច នៅកម្ពុជា។ ហើយសម្តេចក្រឡាហោម ក៏បានថ្លែងអំណរគុណ ជាថ្មីម្តងទៀតចំពោះ ការជួយរបស់ជប៉ុនមកកម្ពុជា ជាពិសេសចុងក្រោយនេះ បានជួយជាថវិកា ជំនួយបច្ចេកទេស សម្ភារៈផ្សេងៗ ជួយដល់ដំណើរការចុះឈ្មោះបោះឆ្នោត ៕
CEN
ដោយ: នរិន្ទ
No comments:
Post a Comment