ភ្នំពេញ៖ តំណាងក្រុមសហជីពធំៗ បានលើកឡើងពីស្ថានភាពកម្មករ-កម្មការិនី ឆ្នាំ២០១៦ ថា ជាឆ្នាំដែលមានការប្រែប្រួលប្រសើរតិចបំផុតនៃជីវភាពរបស់កម្មករ-កម្មការិនី រោងចក្រកាត់ដេរ។ ជាមួយគ្នានេះ មេដឹកនាំសហជីពក៏ត្អូញត្អែរពីសម្ពាធការងារមកលើក្រុមខ្លួន ដោយសាររដ្ឋាភិបាលបង្កើតច្បាប់សហជីព។
បន្ទាប់ពីមានការចរចាតានតឹងអស់ពេលជាយូររវាងតំណាងសហជីពនិងតំណាងសមាគមរោងចក្រ ប្រាក់ខែគោលសម្រាប់កម្មករត្រូវបានគេដំឡើងពី ១៤០ដុល្លារ ទៅ១៥៣ដុល្លារក្នុងមួយខែ។ ប៉ុន្តែតំណាងសហជីពនិយាយថា ពួកគេនៅមិនទាន់ពេញចិត្តនឹងលទ្ធផលនេះទេ ដោយសារថា ប្រាក់បៀវត្សគោលនេះ មិនទាន់គ្រប់គ្រាន់សម្រាប់សេចក្តីត្រូវការប្រចាំថ្ងៃរបស់កម្មករឡើយ។
លោក ជា មុន្នី ទីប្រឹក្សាសហជីពសេរីកម្មករ បានលើកឡើងដូច្នេះថា៖ «ឆ្នាំ២០១៦ មិនមានការប្រែប្រួល ជាដុំកំភួន សម្រាប់កម្មករនោះទេ។ សម្រាប់ឆ្នាំ២០១៧ខាងមុខ ទំនងក៏គ្មានអ្វីប្រែប្រួលដែរ ដោយកាន់តែអយុត្តិធម៌ ពីមួយឆ្នាំ ទៅមួយឆ្នាំ»។ អ្វីដែលលោក ជា មុន្នី ចាត់ទុកថាអយុត្តិធម៌នោះគឺ ការដាក់សម្ពាធលើសហជីព ដោយផ្ដល់តម្លៃដល់និយោជក។ លោក មុន្នី និយាយយ៉ាងនេះថា៖ «សហជីព ដែលប្រឆាំងនឹងរដ្ឋាភិបាល អាចនឹងជាប់គុកជាដើម។ ប៉ុន្តែ សហជីពដែលរដ្ឋាភិបាលថែរក្សាអាចធ្វើខ្យល់ ធ្វើព្យុះ បានយ៉ាងស្រួល»។
បន្ថែមលើនេះ អតីតប្រធានសហជីពសេរីកម្មកររូបនេះ យល់ថា ប្រាក់ឈ្នួលរបស់ កម្មករដែលនឹងទទួល ១៥៣ដុល្លារ នៅដើមឆ្នាំ ២០១៧ គឺមិនទាន់គ្រប់គ្រាន់ឡើយ ដោយលោកលើកឡើងថា បញ្ហាការបរិភោគ ចំណី អាហារ បន្លែ សាច់ មានតម្លៃខ្ពស់។
ចំណែកប្រធានសហព័ន្ធសហជីពចលនាកម្មករលោក ប៉ាវ ស៊ីណា បានបញ្ចេញទស្សនៈបែបសុទិដ្ឋនិយមបន្តិចដោយនិយាយថា ក្រៅពីការដំឡើងប្រាក់ខែគោល ក្រុមសហជីពសម្រេចបានការទាមទារឲ្យមានការយកចិត្តទុកដាក់ លើបញ្ហាសុខភាពរបស់កម្មករដែរ។ លោក ប៉ាវ ស៊ីណា យល់ថា នេះជាសមិទ្ធផលដែលគួរតែរីករាយ។
សម្រាប់ឆ្នាំ២០១៧ខាងមុខនេះ លោក ប៉ាវ ស៊ីណា បានបញ្ជាក់ថា លោកមិនមានផែនការអ្វីនោះទេ ប៉ុន្តែ អាច នឹងមានកិច្ចប្រជុំធំមួយនៅខេត្តសៀមរាបនាដើមឆ្នាំ២០១៧ ដោយមានការចូលរួមពីកម្មករ ដែលលើកយកបញ្ហា ប្រឈម និងសំណូមពរផ្សេងៗ មកពិភាក្សា។
លោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា និយាយថា ក្នុងឆ្នាំ២០១៦ កន្លងទៅ សម្រេចបានផែនការធំៗជាច្រើនជាអត្ថប្រយោជន៍ដល់កម្មករជាសមាជិករបស់សហជីព។ ក្រៅពីការដំឡើងប្រាក់ខែគោល និងការថែទាំសុខភាព ការអនុគ្រោះពន្ធក៏ជាសមិទ្ធផលសំខាន់មួយទៀតដែរដែលសហជីពទាមទារបានពីរដ្ឋាភិបាល។ ក៏ប៉ុន្តែលោកនិយាយថា លោក មិនទាន់ ពេញចិត្តជាមួយសមិទ្ធផលទាំងនោះនៅឡើយទេ។
ទន្ទឹមនឹងនេះ លោក អាត់ ធន់ និយាយថា ការធ្វើបាបសកម្មជនសហជីព ក្នុងនោះមានការចាប់ខ្លួនដាក់គុកជាដើម នៅតែជាការខ្វាយខ្វល់មួយធំនៅឡើយសម្រាប់កម្មករ។ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជារូបនេះ និយាយថា ការគាបសង្កត់ គ្មានភាពយុត្តិធម៌ នៅតែបន្តកើតមានដល់ពួកកម្មករ ធ្វើឲ្យសិទ្ធិសេរីភាពរបស់ពួកគេទទួលរងការរឹតត្បឹតនិងធ្លាក់ចុះជាងមុនៗ។
លោក អាត់ ធន់ បានបន្តទៀតថា នៅឆ្នាំ២០១៧ខាងមុខនេះ លោកនឹងមានគម្រោងចរចាប្រាក់ឈ្នួលបន្ថែមទៀត ឲ្យបាន ១៧៩ ដុល្លារ និងបញ្ហាថែទាំសុខភាពរបស់កម្មករឲ្យបាន ១លាននាក់ផងដែរ។ បញ្ហាសុវត្ថិភាពធ្វើដំណើររបស់កម្មករក៏ជាអាទិភាពមួយទៀតដែលលោកនឹងបន្តជំរុញធ្វើ ដើម្បីកាត់បន្ថយហានិភ័យក្នុងការធ្វើដំណើររបស់ពួកគេទៅធ្វើការ។
ទាក់ទងនឹងបញ្ហាធ្វើដំណើររបស់កម្មករនេះដែរ នាខែធ្នូ ឆ្នាំ២០១៦នេះ មានករណីគ្រោះថ្នាក់ចរាចរណ៍កើតឡើង ចំនួន២ ករណី ដែលបង្កគ្រោះថ្នាក់ដល់កម្មកររោងចក្រជាច្រើននាក់។ ដោយកាលពីថ្ងៃទី ០១ ខែធ្នូ មានករណីគ្រោះថ្នាក់ចរាចរណ៍ ក្រឡាប់រ៉ឺម៉កដឹកកម្មករ នៅក្នុងខេត្តកំពង់ចាម ដែលបណ្ដាលឲ្យកម្មកររងរបួស ២៤នាក់។ ជាមួយគ្នានេះ ករណីមួយទៀត កើតឡើងនៅក្រុងបាវិត ខេត្តស្វាយរៀង កាលពីថ្ងៃទី២៣ ខែធ្នូ ដែលបង្កគ្រោះថ្នាក់ដល់កម្មកររងរបួស ៤៣នាក់ ដោយសារក្រឡាប់រថយន្ត។
ខុសពីតំណាងសហជីពខាងលើ លោក សោម អូន ប្រធានក្រុមប្រឹក្សាសហជីពកម្ពុជា និងជាសម្ព័ន្ធសហជីពកម្មករកម្ពុជាសហជីព មិនផ្តល់ការបកស្រាយអំពីផែនការនិងលទ្ធផលការងារដែលលោកបានអនុវត្តឡើយ ដោយលោកនិយាយថា មិនទាន់បូកសរុបរបាយការណ៍ប្រចាំឆ្នាំរួច។
ជាមួយនឹងការមិនពេញចិត្តជាមួយច្បាប់សហជីព ទាំងលោក ជា មុនី លោក ប៉ាវ ស៊ីណា និងលោក អាត់ ធន់ បានសំណូមពរឲ្យរដ្ឋាភិបាលពិនិត្យ និងពិគ្រោះយោបល់ឡើងវិញ នូវច្បាប់សហជីពនេះ ដើម្បីកុំឲ្យវាមានការរឹតត្បិត និងគាបសង្កត់ខ្លាំងពេកទៅលើបណ្តាសហជីពតំណាងកម្មករ។
ទាក់ទងនឹងច្បាប់សហជីពនេះដែរ លោក អាត់ ធន់ បានរៀបរាប់ថា ចំនុចមួយចំនួនមានការរឹតបន្តឹងសហជីព ក្នុងនោះមានមាត្រា១៤, មាត្រា២៤, មាត្រា២៩ និងមាត្រា៨០ ។ លោក អាត់ ធន់ បានលើកឡើងថា មាត្រា១៤ បានចែងពី អានុភាពនៃការចុះបញ្ជី និង មាត្រា២៤ ទាក់ទងនឹងរបាយការណ៍ហិរញ្ញវត្ថុ គឺការប្រើប្រាស់បហិរញ្ញវត្ថុ និងទ្រព្យសម្បត្តិឲ្យស្របទៅតាមលក្ខន្តិកៈ និងច្បាប់។ លើសពីនេះ មាត្រា២៩ ផ្ដោតទៅលើការរំលាយចោសដោយតុលាការការងារ និងមាត្រា៨០ និយាយពី ការធ្វើសកម្មភាពដោយមិនចុះបញ្ជី។ លោក អាត់ ធន់ យល់ថា មាត្រាទាំងនេះ មានការរឹតបន្តឹងដល់ក្រុមសហជីព ហើយលោកក៏បានស្នើឲ្យរដ្ឋាភិបាលពិនិត្យ និងធ្វើវិសោធនកម្មច្បាប់នេះឡើងវិញផងដែរ៕
ថ្មីៗ
អត្ថបទ : ញឹក ស្រីល័ក្ខ
No comments:
Post a Comment