នៅឆ្នាំ២០២៥ ទើបកម្ពុជាមានលទ្ធភាពផ្គត់ផ្គង់ទឹកស្អាតនៅទូទាំងក្រុងភ្នំពេញ ខណៈបច្ចុប្បន្នរដ្ឋាករទឹកស្វយ័តក្រុងភ្នំពេញ(PPWSA)មានលទ្ធភាពផ្គត់ផ្គង់ទឹកបានប្រមាណ៨៥ភាគរយប៉ុណ្ណោះ។ មានន័យថា ពលរដ្ឋប្រមាណ ១៥ភាគរយដែលនៅសល់នោះ ត្រូវរង់ចាំជិត១០ឆ្នាំទៀត។
នៅមានប្រជាពលរដ្ឋប្រមាណ១៥ភាគរយទៀតក្នុងរាជធានីភ្នំពេញ មិនទាន់មានទឹកស្អាតប្រើប្រាស់។ នេះ បើតាមលោក ស៊ឹម ស៊ីថា អគ្គនាយកនៃរដ្ឋាករទឹកស្វយ័តក្រុងភ្នំពេញ ដែលបញ្ជាក់ប្រាប់សារព័ត៌មានថ្មីៗ នៅថ្ងៃទី២៦ ខែធ្នូ។
តាមផែនការ រហូតដល់ឆ្នាំ២០២៥ ទើបPPWSA មានលទ្ធភាពផ្គត់ផ្គង់ទឹកស្អាត ដល់ប្រជាពលរដ្ឋរស់នៅទូទាំងក្រុងភ្នំពេញ។ លោក ស៊ឹម ស៊ីថា បន្តដូច្នេះ មុននឹងពន្យល់បន្ថែមថា៖«ការសង់រោងចក្រមួយៗ យើងត្រូវចំណាយពេលប្រហែលពី៤ ទៅ៥ឆ្នាំ យើងត្រូវសិក្សារកទីតាំងស៊ីពេល១ឆ្នាំ យើងត្រូវរកជំនួយឥណទាន ហើយការសង់រោងចក្រនោះ ស៊ីពេល២ទៅ៣ឆ្នាំទៀត។ ដូច្នេះទើបយូរ»។
បើតាមលោក ស៊ឹម ស៊ីថា PPWSA ត្រូវសាងសង់រោងចក្រផលិតទឹកស្អាតមួយទៀត ដើម្បីពង្រីកវិសាលភាពផ្គត់ផ្គង់ទឹកស្អាត ឲ្យដល់ប្រជាពលរដ្ឋនៅទូទាំងក្រុងភ្នំពេញ។ អគ្គនាយក PPWSA រូបនេះ បញ្ជាក់ទៀតថា PPWSA កំពុងសិក្សានៅទីតាំងសង់រោងចក្រ នៅ២ទីតាំង គឺនៅសង្កាត់ព្រែកតាសេក និងសង្កាត់ព្រែលាប ក្នុងខណ្ឌជ្រោយចង្វារ ប៉ុន្តែលោក ស៊ឹម ស៊ីថា មិនបង្ហើបពីទំហំទឹកប្រាក់ដែលត្រូវការ ដើម្បីសង់រោងចក្រថ្មីនេះទេ។
បច្ចុប្បន្នកម្ពុជា មានរោងចក្រផលិតទឹកស្អាតចំនួន៤ ដែលមានលទ្ធភាពផលិតទឹកបានប្រមាណ ៥៦ ម៉ឺនម៉ែត្រគីបប៉ុណ្ណោះក្នុងមួយថ្ងៃ ខណៈតម្រូវការមានច្រើនជាង៦០ម៉ឺនម៉ែត្រគីប។ នេះជាការបញ្ជាក់របស់ អគ្គនាយក PPWSA ដែលឲ្យដឹងទៀតថា ពលរដ្ឋប្រមាណ១៥ភាគរយទៀត មិនទាន់មានទឹកស្អាតប្រើប្រាស់ រស់នៅក្នុងសង្កាត់ចំនួន២០ដែលទើបកាត់បញ្ចូលក្នុងក្រុងភ្នំពេញ៕
ថ្មីៗ
អត្ថបទ : ខន ចំប៉ា
No comments:
Post a Comment