ព្រះសីហនុ: ប្រព័ន្ធខ្សែកាប្លិ៍អុបទិក ក្រោមបាតសមុទ្រ MCT ដែលតភ្ជាប់ពីប្រទេស ម៉ាឡេស៊ី ប្រទេសកម្ពុជា និង ប្រទេសថៃ បានមកដល់ខេត្តព្រះសីហនុ នាថ្ងៃទី៤ ខែមករា ឆ្នាំ២០១៧ វេលាម៉ោង ៦:៣៧នាទីល្ងាច។ នាវា និងក្រុមវិស្វករជំនាញ របស់ក្រុមហ៊ុន អ៊ីហ្ស៊ីខម បានធ្វើការអូស និងតភ្ជាប់ខ្សែកាប្លិ៍អុបទិក ក្រោមបាតសមុទ្រនេះ ទៅស្ថានីយ៍ខ្សែកាប្លិ៍ មិត្តភាពនៅខេត្តព្រះសីហនុ នៅវេលាម៉ោង ៦:១៧នាទី ព្រឹក ថ្ងៃទី៥ ខែមករា ឆ្នាំ២០១៧ ក្រោមវត្តមាន ក្នុងការចុះត្រួតពិនិត្យពី លោក ម៉ូវ ចរិយា ប្រធាននិយ័តករ ទូរគនាគមន៍កម្ពុជា និងសហការី។
ក្រុមហ៊ុន តែលកូថេក ដែលជាក្រុមហ៊ុនមួយ របស់អ៊ីហ្ស៊ីខម បានប្រកាសការធ្វើការ សាងសង់ខ្សែកាប្លិ៍អុបទិក ក្រោមបាតសមុទ្រ MCT កាលពីខែមិថុនា ឆ្នាំ២០១៣ និងប្រកាសចាប់ផ្តើមប្រតិបត្តិការ នៅត្រីមាសទីមួយ នៃឆ្នាំ២០១៧។ នាពេលថ្មីៗ កន្លងទៅនេះ ក្រុមហ៊ុន តែលកូថេក បានបញ្ចប់ការសាងសង់ ស្ថានីយ៍កណ្តាល សម្រាប់ខ្សែកាប្លិ៍ MCT ក្នុងខេត្តព្រះសីហនុ ដែលមានឈ្មោះថា “ស្ថានីយ៍ខ្សែកាប្លិ៍អុបទិក ក្រោមបាតសមុទ្រមិត្តភាព” ដែលមានទីតាំង ស្ថិតនៅឆ្នេរអូត្រះ ខេត្តព្រះសីហនុ។
ខ្សែកាប្លិ៍អុបទិក ក្រោមបាតសមុទ្រ MCT មានវិសាលភាព ប្រហែល ១.៣០០ គីឡូម៉ែត្រ និងអនុម័តនូវបច្ចេកវិទ្យា ១០០ Gbps ជាមួយនឹងសមត្ថភាពគាំទ្រ យ៉ាងហោចណាស់ ៣០Tbps។ វានឹងធ្វើឲ្យកម្ពុជា ក្លាយជាច្រកចេញចូល ទៅកាន់តំបន់អាស៊ី និងជួយពង្រីកការតភ្ជាប់ របស់កម្ពុជា ទៅកាន់អាស៊ាន ក៏ដូចជា ពិភពលោកទាំងមូល តាមរយៈប្រទេសម៉ាឡេស៊ី និងប្រទេសថៃ។ ខ្សែកាប្លិ៍អុបទិក ក្រោមបាតសមុទ្រនេះ មានតម្លៃវិនិយោគជិត ១០០ លានដុល្លារ សហរដ្ឋអាមេរិក។
លោក ថាន ថេន នាយកផ្នែកពាណិជ្ជកម្ម របស់ក្រុមហ៊ុន អ៊ីហ្ស៊ីខម បានឲ្យដឹងថា “ក្រុមហ៊ុន អ៊ីហ្ស៊ីខម តែលកូថេក កំពុងខិតខំរួមចំណែក ធ្វើអោយកម្ពុជា មានឯករាជ្យភាព ក្នុងវិស័យទូរគមនាគមន៍ និងប្រព័ន្ធអ៊ីនធឺណិត ព្រមទាំងលើកកម្ពស់សមត្ថភាព សេវាសារគមនាគមន៍ ទូទៅរបស់ប្រទេស ដែលធានាបាននូវ សន្តិសុខ និងសុវត្ថិភាពទិន្នន័យ តាមរយៈការនាំមកនូវ ខ្សែកាប្លិ៍អុបទិក ក្រោមបាតសមុទ្រ លើកដំបូងនៅកម្ពុជា។”
លោកបានបញ្ជាក់ទៀតថា “លទ្ធភាពដែលកម្ពុជា អាចតម្លើងខ្សែកាប្លិ៍អុបទិក ក្រោមបាតសមុទ្រនេះ គឺជាការបង្ហាញនូវភាពខ្លាំង របស់កម្ពុជា ក្នុងឯករាជ្យភាព នៃការផ្គត់ផ្គង់សេវាអ៊ីនធឺណិត ដែលមានល្បឿនលឿន ហើយអាចធានាបាន នូវសន្តិសុខ និងសុវត្ថិភាពព័ត៌មាន និងទិន្នន័យទូរគមនាគមន៍ ព័ត៌មានវិទ្យា។”
លោក ម៉ូវ ចរិយា ប្រធាននិយ័តករ ទូរគមនាគមន៍កម្ពុជា ដែលជាអ្នកចុះត្រួតពិនិត្យ ការអូសខ្សែកាប្លិ៍អុបទិក បានមានប្រសាសន៍ថា “ការចុះពិនិត្យ ខ្សែកាប្លិ៍អុបទិក នាពេលនេះ គឺដើម្បីពិនិត្យ ទៅលើបច្ចេកទេស របស់ក្រុមហ៊ុន ក្នុងការអូសខ្សែកាប្លិ៍ ក្រោមបាតសមុទ្រ ជាលើកទី១ សម្រាប់ប្រទេសកម្ពុជាយើង។ ទាំងនេះ គឺជាការរីកចំរើនរបស់ ប្រទេសកម្ពុជា ដែលមានបណ្តាញខ្សែកាប្លិ៍អុបទិក ក្រោមបាតសមុទ្រ ល្បឿនលឿន សម្រាប់ការប្រើប្រាស់ នឹងកាត់នូវរយៈចំងាយ ដែលកន្លងមក យើងធ្វើការអូសឆ្លងកាត់ប្រទេសថៃ ប្រទេសវៀតណាម តាមបណ្តាញផ្លូវគោក មកដល់ប្រទេសកម្ពុជា”។
សូមរំលឹកថា ក្រុមហ៊ុនអ៊ីហ្ស៊ីខម ត្រូវបានបង្កើតឡើង ដើម្បីបម្រើសេចក្តីត្រូវការ របស់បណ្តាសហគ្រាស អាជីវកម្មទាំងឡាយ ព្រមទាំងអ្នកប្រើប្រាស់ នៅតាមគេហដ្ឋាន ដែលកំពុងមានតម្រូវការ កើនឡើងយ៉ាងឆាប់រហ័ស ក្នុងទីផ្សារកម្ពុជា។ ចាប់តាំងពីបានបង្កើតឡើង នៅក្នុងឆ្នាំ២០០៧ អ៊ីហ្ស៊ីខម បានក្លាយខ្លួនជា អ្នកនាំមុខគេមួយ ក្នុងការផ្គត់ផ្គង់សេវាកម្ម ផ្នែកទំនាក់ទំនងថ្មីៗ យ៉ាងសម្បូរបែប។ ក្រុមហ៊ុនអ៊ីហ្ស៊ីខម ផ្តល់នូវសេវាខ្សែកាប្លិ៍អុបទិក ការទំនាក់ទំនងជាសំឡេង តាមអ៊ីនធឺណិត (VoIP) ការតភ្ជាប់ក្នុងស្រុក (VPN) និងដំណោះស្រាយ តាមអ៊ីនធឺណិត និងទូរគនាមគមន៍ ដទៃទៀត។ ក្រុមហ៊ុនអ៊ីហ្ស៊ីខម បានទិញយកក្រុមហ៊ុន ខ្សែកាប្លិ៍អុបទិក Telcotech ដែលនឹងនាំមកនូវសេវាអ៊ីនធឺណិត ដែលមានល្បឿនលឿន និងទុកចិត្តបំផុត មកកាន់ប្រទេសកម្ពុជា នៅឆ្នាំក្រោយនេះ តាមរយៈការបង្កើត ខ្សែកាប្លិ៍អុបទិក ក្រោមបាតសមុទ្រ ម៉ាឡេស៊ី-កម្ពុជា-ថៃ (MCT)៕
CEN
ដោយ: ក្រុមហ៊ុន
No comments:
Post a Comment