ភ្នំពេញ ៖ លោក Pierre AMILHAT អគ្គនាយកដ្ឋាន សហប្រតិបត្តិការអន្តរជាតិ និងអភិវឌ្ឍន៍ នៃសភាពអឺរ៉ុប បានសន្យា នឹងភាគីកម្ពុជាថា សភាពអឺរ៉ុប នឹងបន្តផ្ដល់ជំនួយបច្ចេកទេសខាងផ្លូវច្បាប់ដល់ភាគីកម្ពុជាក្នុងការចូលរួមចំណែករបស់កម្ពុជាលើការ ប្រយុទ្ធប្រឆាំងការនេសាទខុសច្បាប់នៅដែននេសាទសមុទ្រអន្តរជាតិ ដែលមិនមានរបាយការណ៍ និងមិនគោរពច្បាប់។
ការសន្យានេះ បានធ្វើឡើងនៅក្នុងជំនួបពិភាក្សាការងាររវាង លោកខេង សាខុន រដ្ឋមន្ត្រីក្រសួងកសិកម្មកម្ពុជា និងលោកPierre AMILHAT អគ្គនាយកដ្ឋាន សហប្រតិបត្តិការអន្តរជាតិ និងអភិវឌ្ឍន៍ នៃសភាពអឺរ៉ុប នៅទីក្រុងប្រូសសែល កាលពីថ្ងៃទី១៨ ខែមករា ឆ្នាំ២០១៧ នៅទីក្រុងប្រូសសែល ដើម្បីពិនិត្យមើលលើបណ្ដាគម្រោងមួយចំនួន ដែលត្រូវផ្ដល់ហិរញ្ញប្បទានឥតសំណងសម្រាប់បណ្ដាឆ្នាំខាងមុខ។
នៅក្នុងជំនួបនោះ ភាគីទាំងពីរបានពិនិត្យឯកសារគម្រោងកម្មវិធី ដែលត្រូវបានព្រាងរៀបចំឡើងដោយមន្ត្រីជំនាញរបស់សភាពអឺរ៉ុប និងមន្ត្រីពាក់ព័ន្ធ នៃក្រសួងកសិកម្ម រុក្ខាប្រមាញ់ និងនេសាទកន្លងមក។
គម្រោងទាំងនោះរួមមាន ១-ការពង្រឹងសមត្ថភាព ដោយដល់រដ្ឋបាលជលផល លើការអភិវឌ្ឍ និងការកែលម្អតួនាទីរបស់រដ្ឋបាលជលផល ក្នុងការប្រើប្រាស់ និងគ្រប់គ្រងធនធានជលផលប្រកបដោយនិរន្តរភាព។ ២-ការផ្តល់គាំទ្រដល់សហគមន៍នេសាទ ក្នុងការទទួលបាននូវបទប្បញ្ញត្តិនានា និងការគ្រប់គ្រង និងការប្រព្រឹត្តទៅនៅក្នុងដែនសហគមន៍របស់ខ្លួនប្រកបដោយប្រសិទ្ធភាព។ ៣- ការត្រួតពិនិត្យ និងវាយតម្លៃសកម្មភាព នៃការគ្រប់គ្រង និងអភិវឌ្ឍន៍សហគមន៍នេសាទ។ ៤-ការធ្វើឲ្យប្រសើរឡើងលើការគ្រប់គ្រង និងតំបន់អភិរក្ស ដែលនៅបឹងទន្លេសាប នៅមេគង្គ និងនៅសមុទ្រ។
លោក Pierre AMILHAT អគ្គនាយកដ្ឋាន សហប្រតិបត្តិការអន្តរជាតិ និងអភិវឌ្ឍន៍ នៃសភាពអឺរ៉ុប ក៏បានវាយតម្លៃខ្ពស់ ១-ធ្វើការវាយតម្លៃខ្ពស់ចំពោះការខិតខំប្រឹងប្រែងរបស់រាជរដ្ឋាភិបាលកម្ពុជាក្នុងការជំរុញកំណើនសេដ្ឋកិច្ចបានល្អប្រសើរ។ ២-កោតសរសើរចំពោះប្រមុខរាជរដ្ឋាភិបាលកម្ពុជាយើងថា បានចាត់វិធានការបានល្អប្រសើរក្នុងរយៈពេលថ្មីៗនេះ លើការបង្ក្រាបបទល្មើសនេសាទ ជាពិសេសនៅបឹងទន្លេសាប។ ៣-បានទទួលស្គាល់ស្ដីពីការខិតខំប្រឹងប្រែងរបស់ក្រសួងកសិកម្ម និងនេសាទមួយរយៈកន្លងមក និងបានកំពុងសហការបានល្អជាមួយ គម្រោងកម្មវិធីរបស់សភាពអឺរ៉ុប។ ៤-ក្នុងនាមជាអគ្គនាយកដ្ឋាន សហប្រតិបត្តិការអន្តរជាតិ និងអភិវឌ្ឍន៍ នៃសភាពអឺរ៉ុប នឹងខិតខំប្រឹងប្រែងធ្វើយ៉ាងណាឲ្យគម្រោងកម្មវិធីខាងលើនេះឈានទៅដល់ការចុះហត្ថលេខាក្នុងត្រីមាសទីពីរក្នុងឆ្នាំនេះឲ្យបាន លើទឹកប្រាក់ប្រមាណជាជាង៣០លានអឺរ៉ូ។
លោកបន្ថែមថា សភាពអឺរ៉ុប ហើយនឹងបន្តផ្តល់ជំនួយបច្ចេកទេសខាងផ្លូវច្បាប់ដល់ភាគីកម្ពុជាក្នុងការចូលរួមចំណែករបស់កម្ពុជាលើការការប្រយុទ្ធប្រឆាំងការនេសាទខុសច្បាប់នៅដែននេសាទសមុទ្រអន្តរជាតិ ដែលមិនមានរបាយការណ៍ និងមិនគោរពច្បាប់៕
កម្ពុជាថ្មី
ឌួងវិរះជ័យ
No comments:
Post a Comment