ភ្នំពេញ ៖ កំពូលតារាចម្រៀងស្រីមានកេរ្តិ៍ឈ្មោះល្បីរន្ទឺប្រចាំផលិតកម្មថោន មាស សុខសោភា មិនត្រឹមតែមានប្រជាប្រិយភាព និង ទទួលបានការគាំទ្រខ្លាំងពីសំណាក់មជ្ឈដ្ឋានមហាជនប៉ុណ្ណោះទេ កន្លងមកតារាចម្រៀងស្រីរូបនេះ ក៏ធ្លាប់ទទួលបានការលើកសរសើរពីអត្តចរិតថា ជាតារាដែលមិនឆ្មើងឆ្មៃថែមទាំងមានភាពរួសរាយរាក់ទាក់ និងរក្សាបានប្រជាប្រិយភាពលំដាប់តារាចម្រៀងស្ថិតបេះដូងទស្សនិកជនទៀតផង។
ស្របពេលដែលកេរ្តិ៍ឈ្មោះល្បីល្បាញនៅតែរក្សាបានក្នុងអាជីពចម្រៀងនេះដែរ តារាចម្រៀងមាស សុខសោភា ថ្មីៗនេះក៏ត្រូវបានព្រះមហាក្សត្រសម្ដេចព្រះបរមនាថនរោត្តម សីហមុនី ប្រោសព្រះរាជទាននូវគ្រឿងឥស្សរិយយស មុនីសារាភ័ណ្ឌ ថ្នាក់មហាសេនា ក្នុងឱកាសនៃទិវាប្រឆាំងអំពើពុករលួយក្រោយប្រធានបទ រស់នៅជាមួយភាពស្អាតស្អំ ដែលធ្វើឡើងក្រោមវត្តមានរបស់លោកជំទាវ ម៉ែន សំអន ឧបនាយករដ្ឋមន្ត្រីនៃព្រះរាជាណាចក្រកម្ពុជា។
ជាមួយគ្នានៃការទទួលបានគ្រឿងឥស្សរិយយសនេះដែរ តារាចម្រៀងស្រីល្បីឈ្មោះ មាស សុខសោភា បានសរសេរបង្ហោះភ្ជាប់ជាមួយរូបថតចំនួន៤-៥សន្លឹកថា កម្មវិធីអបអរសាទរទិវាប្រឆាំងអំពើពុករលួយក្រោមប្រធានបទរស់ជាមួយភាពស្អាតស្អំ។ Can’t sleep-hands still shaking. I will do my best, to serve the Royal Family and to better our Kingdom។ តាមរយៈនេះភ្លាមនោះដែរគេសង្កេតឃើញមានមហាជនជាច្រើនបានផ្ញើសារសម្ដែងការចូលរួមសាទរដល់នាងផងដែរ។
សូមបញ្ជាក់ថា កំពូលតារាចម្រៀងស្រីរបស់ផលិតកម្មថោន មាស សុខសោភា កន្លងមកធ្លាប់ត្រូវបានទស្សនិកជនអ្នកគាំទ្រជាច្រើននៅលើបណ្ដាញសង្គមហ្វេសប៊ុកសម្ដែងការគាំទ្រ និងលើកសរសើរពីអត្តចរិតក្នុងនាមតារាស្រីល្បីឈ្មោះប្រចាំប្រទេសកម្ពុជាដែលបានលះបង់ពេលវេលាផ្ទាល់ខ្លួនដើម្បីស្វែងរកមូលនិធិនៅក្រៅប្រទេសជួយដល់កុមារកំព្រា ចាស់ជរា និងជនអនាថាជាដើម។ ពិសេសជាងនេះគឺមានការគាំទ្រខ្លាំងចំពោះសកម្មភាព និងសន្តានចិត្តមនុស្សធម៌ដែលតារារូបនេះបាននិងកំពុងធ្វើនាពេលបច្ចុប្បន្នដើម្បីចូលរួមជួយសង្គមជាតិ៕
កម្ពុជាថ្មី
ចាន់ ដារ៉ា
No comments:
Post a Comment