អតីតប្រធានាធិបតីអ៊ីរ៉ង់លោក Akbar Hashemi Rafsanjani បានស្លាប់ក្នុងវ័យ ៨២ឆ្នាំដោយសារជំងឺគាំងបេះដូងនៅថ្ងៃអាទិត្យទី៨មករា។ វាជាការបាត់បង់ដ៏ធំមួយ ព្រោះលោកជាអ្នកនយោបាយមួយរូបដ៏សំខាន់ដែលជាស្ថាបនិកសាធារណរដ្ឋឥស្លាមអ៊ីរ៉ង់ឆ្នាំ ១៩៧៩ និងទទួលបានការគោរពខ្លាំងពីបណ្តាអ្នកនយោបាយកែទម្រង់និងអ្នកនយោបាយកណ្តាលនិយម។
លោក Akbar Hashemi Rafsanjani ដែលបំពេញការងារជាប្រធានាធិបតីអ៊ីរ៉ង់ក្រោយថ្ងៃបដិវត្តន៍ ឆ្នាំ ១៩៨៩ រហូតដល់ឆ្នាំ ១៩៩៧បានស្លាប់ក្នុងវ័យ ៨២ឆ្នាំដោយសារគាំងបេះដូង។
យោងតាមទីភ្នាក់ងារព័ត៌មាន AFP លោក Rafsanjani បានទទួលការព្យាបាលនៅមន្ទីរពេទ្យ Shohadaa ដែលស្ថិតនៅភាគខាងជើងក្រុងតេហរ៉ង់។ប៉ុន្តែក្រុមគ្រូពេទ្យមិនមានលទ្ធភាពជួយសង្គ្រោះលោកបានឡើយដោយសារលោកមានជំងឺធ្ងន់ធ្ងរ។
ប្រធានក្រុមប្រឹក្សាផ្តល់យោបល់មេដឹកនាំកំពូល (Expediency Council) លោក Reza Soleimani បានអះអាងថា៖«លោក Akbar Hashemi Rafsanjani ត្រូវបានគេបញ្ជូនទៅកាន់មន្ទីពេទ្យក្រោយលោកមានបញ្ហាគាំងបេះដូង។ ទោះគ្រូពេទ្យប្រឹងអស់លទ្ធភាពក៏ដោយ ក៏គាត់មិនអាចឆ្លងផុតការស្លាប់ដែរ»។
តាមពិតទៅលោក Akbar Hashemi Rafsanjani ត្រូវបានគេស្គាល់ច្បាស់ថា ជាស្ថាបនិកមួយរូបក្នុងការបង្កើតសាធារណរដ្ឋឥស្លាមអ៊ីរ៉ង់នៅឆ្នាំ ១៩៧៩ ក្រោយចលនាបដិវត្តន៍ឥស្លាម។ហើយមិនត្រឹមតែប៉ុណ្ណោះលោកក៏ជាអ្នកនយោបាយមួយរូបដែលទទួលបានការគោរពខ្លាំងពីបណ្តាអ្នកនយោបាយទាំងពីរក្រុមមានទាំងក្រុមកែទម្រង់និងក្រុមកណ្តាលនយោបាយ។ ដូច្នេះហើយការស្លាប់បាត់បង់ជីវិតរបស់អតីតប្រធានាធិបតីរូបនេះជាការបាត់បង់មួយដ៏ធំធេងសម្រាប់អ៊ីរ៉ង់។
សូមបញ្ជាក់ថា លោក Akbar Hashemi Rafsanjani បានកើតនៅថ្ងៃ ២៥ សីហា ឆ្នាំ ១៩៣៤ នៅភូមិ Nough នៅភាគខាងត្បូងអ៊ីរ៉ង់។ លោកបានចូលប្រឡូកក្នុងវិស័យនយោបាយឆ្នាំ ១៩៦៣ ក្រោយពេលដែលរបបដឹកនាំស្តេចសា (Shah) ចាប់ខ្លួនមេដឹកនាំសាសនាឥស្លាម Ruhollah Khomeini។ មុនពេលលោកឡើងកាន់តំណែងជាប្រធានាធិបតី លោក Akbar Hashemi Rafsanjani ធ្លាប់បំពេញមុខងារជាប្រធានរដ្ឋសភាពីរអាណត្តិ៕
ថ្មីៗ
អត្ថបទ : ថ្មីៗ
No comments:
Post a Comment