រដ្ឋសភា នឹងបើកកិច្ចប្រជុំលុបតំណែង ឯកឧត្តម កឹម សុខា នៅថ្ងៃចន្ទនេះ។ កិច្ចប្រជុំនេះ ធ្វើឡើងមួយ សប្តាហ៍ ក្រោយការស្នើពីសម្តេចនាយករដ្ឋមន្ត្រី និងតំណាងរាស្ត្រគណបក្សប្រជាជនកម្ពុជា។
រដ្ឋសភា នឹងបើកកិច្ចប្រជុំគណៈកម្មការអចិន្ត្រៃយ៍ ដើម្បីលុបតំណែងប្រធានមតិភាគតិចរបស់ ឯកឧត្តម កឹម សុខា នៅក្នុងរដ្ឋសភានៅថ្ងៃចន្ទ ទី២៣ ខែមករា។ លោក ឡេង ប៉េងឡុង អ្នកនាំពាក្យរដ្ឋសភា បានថ្លែងប្រាប់សារព័ត៌មានថ្មីៗតាមទូរសព្ទដូច្នេះថា៖«របៀបវារៈនៃកិច្ចប្រជុំមានតែមួយទេ គឺវិសោធនកម្មប្រការទី៤៨ថ្មី (បី)»។
វិសោធនកម្មនេះ ធ្វើឡើងមួយសប្តាហ៍ក្រោយពី សម្តេច ហ៊ុន សែន នាយករដ្ឋមន្ត្រី និងជាប្រធានបក្សកាន់អំណាច បានបង្ហាញបំណងលុបចោលតំណែងជាប្រធានក្រុមមតិភាគតិច និងប្រធានក្រុមតំណាងរាស្ត្ររបស់ឯកឧត្តម កឹម សុខា។ ជាតំណែងដែលអនុប្រធានគណបក្សសង្គ្រោះជាតិរូបនេះ ទើបទទួលបានក្រោយការលើកលែងទោសពីព្រះមហាក្សត្រកាលពីដើមខែធ្នូកន្លងទៅ។
តាមរយៈ Fresh News សម្តេចបានប្រកាសថា៖«បើយន្តការដែលទើបបង្កើតឡើងតាមរយៈប្រការ៤៨ថ្មី (បី) វាពិបាកធ្វើការដោយរួមទាំងការប៉ុនប៉ងប្រើប្រាស់វាដើម្បីចរចាដោះលែងអ្នកទោសដែលបំពានដល់អំណាចតុលាការផងនោះយើងត្រូវតែធ្វើវិសោធនកម្មប្រការ៤៨ថ្មី (បី) ហើយវិលទៅប្រើប្រការ ៤៨ (ពីរ)នៃបទបញ្ជាផ្ទៃក្នុងនៃរដ្ឋសភាវិញ។ ដោយសារប្រការ ៤៨ថ្មី (បី)ជាគំនិតផ្តួចផ្តើមរបស់ខ្ញុំ ទើបខ្ញុំស្នើសុំឲ្យធ្វើការកែប្រែតាមរយៈសមាជិកសភាគណបក្សប្រជាជនកម្ពុជា វិញ»។
សារព័ត៌មានថ្មីៗ មិនអាចសុំការអត្ថាធិប្បាយពីអ្នកនាំពាក្យគណបក្សសង្គ្រោះជាតិ លោក យឹម សុវណ្ណ បានទេជុំវិញបញ្ហានេះ ដោយទូរសព្ទចូលគ្មានអ្នកទទួល។
ជុំវិញវិសោធនកម្មប្រការទី៤៨ថ្មីនេះ ត្រូវបានអ្នកវិភាគយល់ឃើញថា ដោយសារតែបរាជ័យក្នុងការបំបែកគណបក្សសង្គ្រោះជាតិ ខណៈអ្នកនាំពាក្យបក្សប្រជាជនកម្ពុជា អះអាងថាជាការកែប្រែច្បាប់ធម្មតា ដើម្បីឲ្យស្ថាប័នរដ្ឋសភា ដំណើរការទៅកាន់តែមានប្រសិទ្ធភាព៕
ថ្មីៗ
អត្ថបទ : ខន ចំប៉ា
No comments:
Post a Comment