តារា​ល្បីៗ​នៅលើ​ពិភពលោក​ដែលមាន​ប្រវត្តិ​រៀបការ​ពី​៤​ទៅ​៩​ដង

តារា​ហូលីវូត អ្នកចម្រៀង អ្នកនិពន្ធ អ្នក​បង្ហាញ​ម៉ូដ និង​តារា​ល្បីៗ​មួយចំនួន​នៅលើ​ពិភពលោក មិនមាន​ស្នេហា​ឋិតថេរ រឹងមាំ​នោះឡើយ ដោយ​ពួកគេ​បានធ្វើការ​ផ្លាស់ប្តូរ​ដូច​អាវ​សំពត់​។ កាសែត Daily News ដ៏​ល្បី​បានបង្ហាញ​បញ្ជី​ឈ្មោះ​តារា​ល្បីៗ​ដែលមាន​ប្រវត្តិ​រៀបការ​ចាប់ពី​៤​លើក រហូតដល់​ទៅ​៩​លើក​។​

តារាភាពយន្ត​ហូលីវូត Zsa Zsa Gabor រៀបការ​៩​ដង​


Zsa Zsa Gabor ជាប់​ជាតា​រា​ហូលីវូត​ដែល​រៀបការ​ច្រើនលើក​ជាងគេ ពោលគឺ​ដល់​ទៅ​៩​លើក​។ អតីត​បវរកញ្ញា​ហុង​គ្រី​រូបនេះ បាន​រៀបការ​ជាមួយ​អ្នកនយោបាយ​តួ​ក​គី លោក Burhan Aspaf Belge ក្នុង​ឆ្នាំ​១៩៣៧ ហើយ​លែងលះ​នៅ​ឆ្នាំ​១៩៤១ ។ បន្ទាប់មក Gabor រៀបការ​ជាមួយ​អ្នកជំនួញ​ផ្នែក​សណ្ឋាគារ​អាមេរិក លោក Conrad Hilton នៅ​ឆ្នាំ​១៩៤២ ហើយ​លែងលះ​នៅ​ឆ្នាំ​១៩៤៧ ។ ស្វាមី​បន្តបន្ទាប់​របស់ Gabor រួមមាន លោក George Sanders ដែលជា​តារាភាពយន្ត លោក Herbert Hutner ដែលជា​អ្នកវិនិយោគ​ផ្នែក​ធនាគារ លោក Joshua S.Cosden, Jr. លោក Jack Ryan លោក Michael O’Hara លោក Felipe de Alba និង​លោក Frederic Prinz von Anhalt ដែលជា​ស្វាមី​ចុងក្រោយ រហូតដល់ Gabor ទទួលមរណភាព​ក្នុង​អាយុ​៩៩​ឆ្នាំ នា​ខែធ្នូ ឆ្នាំ​២០១៦ ។​

លោក Larry King អ្នកនិពន្ធ និង​ជា​អ្នកវិភាគ​តាម​វិទ្យុ​-​ទូរទស្សន៍ រៀបការ​៨​ដង​


លោក Larry King បច្ចុប្បន្ន អាយុ​៨៣​ឆ្នាំ ជា​អ្នកនិពន្ធ និង​ជា​វិភាគ​តាម​វិទ្យុ ទូរទស្សន៍​ដ៏​ល្បី​នៅលើ​ពិភពលោក​។ លោក​បាន​រៀបការ​៨​លើក​ជាមួយ​នារី​៧​នាក់​។ នៅ​ឆ្នាំ​១៩៥១ គាត់​រៀបការ​ជាមួយ​មិត្ត​រួម​វិទ្យាល័យ Freda Miller ក្នុង​អាយុ​១៨​ឆ្នាំ​។ មួយឆ្នាំ​ក្រោយមក អាពាហ៍ពិពាហ៍​ត្រូវបាន​រំសាយ​។ នៅ​ឆ្នាំ​១៩៦១ គាត់​បាន​រៀបការ​ជាមួយ Annette Kaye ហើយ​លែងលះគ្នា​នៅ​ឆ្នាំ​ដដែល​។ ក្រោយមក​លោក​បាន​រៀបការ​ជាមួយ​តារា Playboy ឈ្មោះ Alene Akins តែ​លែងលះ​នៅ​ឆ្នាំ​១៩៦៣ ហើយ​បន្ត​អាពាហ៍ពិពាហ៍​ជាមួយ​អ្នកកាសែត Mickey Stuphin មុននឹង​លែងលះ​នៅ​ឆ្នាំ​១៩៦៧ ។ លោក​បាន​រៀបការ​ម្តងទៀត​ជាមួយ Alene Akins នៅ​ឆ្នាំ​១៩៦៧ និង​លែងលះគ្នា​ជា​លើក​ទី​២​នៅ​ឆ្នាំ​១៩៧២ ។ ភរិយា​ជា​បន្តបន្ទាប់​របស់ King មាន Sharon Lepore (១៩៧៦ ដល់​១៩៨៣) Julie Alexander (១៩៨៩ ដល់​១៩៩២) និង Shawn Southwick ដែល​រួមរស់​ជាមួយគ្នា​ពី​ឆ្នាំ​១៩៩៧ រហូតដល់​បច្ចុប្បន្ន​។ លោក King មានកូន​៥​នាក់​។​

Elizabeth Taylor អតីត​តារា​ហូលីវូត​អង់គ្លេស​កាត់​អាមេរិក រៀបការ​៨​ដង​


Elizabeth Taylor ដែល​បានទទួល​មរណភាព​ក្នុង​អាយុ​៧៩​ឆ្នាំ​កាលពី​ឆ្នាំ​២០១១ ធ្លាប់​រៀបការ​ចំនួន​៨​លើក​ជាមួយ​បុរស​៧​នាក់​។ ស្វាមី​របស់​អតីត​តារា​ហូលីវូត​ដ៏​ល្បីល្បាញ​រូបនេះ មាន លោក Conrad Hilton Jr. (​ការ​ឆ្នាំ​១៩៥០ លែងលះ​ឆ្នាំ​១៩៥១) លោក Michael Wilding (​ការ​ឆ្នាំ​១៩៥២ លែងលះ​ឆ្នាំ​១៩៥៧) លោក Mike Todd (​ការ​ឆ្នាំ​១៩៥៧ ស្លាប់​ឆ្នាំ​១៩៥៨) លោក Eddie Fisher (​ការ​ឆ្នាំ​១៩៥៩ លែងលះ​ឆ្នាំ​១៩៦៤ ) លោក Richard Burton (​ការ​ឆ្នាំ​១៩៦៤ លែងលះ​ឆ្នាំ​១៩៧៤ ហើយ​ការ​ម្តងទៀត​នៅ​ឆ្នាំ​១៩៧៥ និង​លែងលះ​នៅ​ឆ្នាំ​១៩៧៦) លោក Jonh Warner (​ការ​ឆ្នាំ​១៩៧៦ និង​លែងលះ​ឆ្នាំ​១៩៨២) និង​លោក Larry Fortensky (​ការ​ឆ្នាំ​១៩៩១ លែងលះ​ឆ្នាំ​១៩៩៦ )​។ Taylor មានកូន​ចំនួន​៤​នាក់​ប៉ុណ្ណោះ​។​

លោក Billy Bob Thornton អ្នក​ផលិត​ភាពយន្ត តារា​សម្តែង អ្នកចម្រៀង និង​ជា​តន្ត្រីករ ធ្លាប់​រៀបការ​៦​លើក​


លោក Billy Bob Thornton ដែល​បច្ចុប្បន្ន មាន​វ័យ​៦១​ឆ្នាំ ជា​មនុស្ស​ដ៏​ល្បីល្បាញ​ម្នាក់​ក្នុង​ឧ​ស្សហកម្ម​ភាពយន្ត តន្ត្រី និង​ចម្រៀង​នៅ​សហរដ្ឋអាមេរិក​។ លោក​បាន​ឆ្លងកាត់​ជីវិត​អាពាហ៍ពិពាហ៍​ចំនួន​៦​លើក ដែល​ក្នុងនោះ មាន Melissa Lee Gatlin (​ការ​ឆ្នាំ​១៩៧៨ លែងលះ​ឆ្នាំ​១៩៨០) Toni Lawrence (​ការ​ឆ្នាំ​១៩៨៦ លែងលះ​ឆ្នាំ​១៩៨៨) Cynda Williams (​ការ​ឆ្នាំ​១៩៩០ លែងលះ​ឆ្នាំ​១៩៩២) Pietra Dawn Cherniak (​ការ​ឆ្នាំ​១៩៩៣ លែងលះ​ឆ្នាំ​១៩៩៧) Angelina Jolie (​ការ​ឆ្នាំ​២០០០ លែងលះ​ឆ្នាំ​២០០៣) និង Connie Angland រស់នៅ​ជាមួយគ្នា​ចាប់តាំងពី​ឆ្នាំ​២០១៤​មក​។ លោក​មានកូន​៥​នាក់​។​

​លោក Martin Scorsese អ្នកដឹកនាំ​រឿង ជាពិសេស​រឿង​បែប​ប្រវត្តិសាស្ត្រ ធ្លាប់​រៀបការ​៥​លើក​
បច្ចុប្បន្ន​ឈានដល់​វ័យ​៧៤​ឆ្នាំ លោក Martin Scoresese អ្នកដឹកនាំ​រឿង​ដ៏​ល្បីល្បាញ​របស់​អាមេរិក​ចាប់តាំងពី​ឆ្នាំ​១៩៦៣​មក​នោះ ធ្លាប់​ឆ្លងកាត់​អាពាហ៍ពិពាហ៍​ចំនួន​៦​លើក​។ ពី​ឆ្នាំ​១៩៦៥ ដល់​ឆ្នាំ​១៩៧១ លោក​បាន​រួមរស់​ជាមួយ Laraine Marie Brennan ពី​ឆ្នាំ​១៩៧៦ ដល់​ឆ្នាំ​១៩៧៧ ជាមួយ Julia Cameron ពី​ឆ្នាំ​១៩៧៩ ដល់​ឆ្នាំ​១៩៨២ ជាមួយ Isabella Rossellini ពី​ឆ្នាំ​១៩៨៥ ដល់​ឆ្នាំ​១៩៩១ ជាមួយ Barbara De Fina និង​រស់នៅ​ជាមួយ Helen Schermerhorn Morris ចាប់តាំងពី​ឆ្នាំ​១៩៩៩ រហូតដល់​បច្ចុប្បន្ន​។ លោក​មានកូន​៣​នាក់​។​

​អ្នកស្រី Joan Collin តារាភាពយន្ត​អង់គ្លេស ធ្លាប់​រៀបការ​៥​លើក​
​ជា​តួកុន និង​ជា​អ្នកនិពន្ធ ចាប់ពី​ឆ្នាំ​១៩៥១​មក បច្ចុប្បន្ន Joan Collin មាន​វ័យ​៨៣​ឆ្នាំ​ហើយ​។ អ្នកសិល្បៈ​អង់គ្លេស​ដ៏​ល្បីល្បាញ និង​កើត​នា​អំឡុង​សង្គ្រាមលោកលើកទី​ពីររូប​នេះ ធ្លាប់​រៀបការ​ចំនួន​៥​លើក ដោយ​ចាប់ផ្តើម​ជាមួយ​លោក Maxwell Reed ពី​ឆ្នាំ​១៩៥២​ដល់​ឆ្នាំ​១៩៥៦ បន្ទាប់មក​ជាមួយ​លោក Anthony Newley (​ពី​ឆ្នាំ​១៩៦៣​ដល់​ឆ្នាំ​១៩៧១) លោក Ronald S.Kass (​ពី​ឆ្នាំ​១៩៧២​ដល់​ឆ្នាំ​១៩៨៣) លោក Peter Holm (​ពី​ឆ្នាំ​១៩៨៥ ដល់​ឆ្នាំ​១៩៨៧) និង​លោក Percy Gibson ពី​ឆ្នាំ​២០០២​រហូតដល់​បច្ចុប្បន្ន​។ អ្នកស្រី​មានកូន​៣​នាក់​។​

​រីឯ​តារា​ដែល​ធ្លាប់​រៀបការ​ចំនួន​៤​លើក​រួមមាន អតីត​អ្នកចម្រៀង​អាមេរិក Frank Sinatra (​មរណភាព​ក្នុង​អាយុ​៨២​ឆ្នាំ​កាលពី​ឆ្នាំ​១៩៩៨ តារា​ហូលីវូត Liza Minnelli (​បច្ចុប្បន្ន​អាយុ​៧០​ឆ្នាំ​) Pamela Anderson តារាភាពយន្ត និង​ជា​អ្នក​បង្ហាញ​ម៉ូត​កាណាដា​កាត់​អាមេរិក ដែល​បច្ចុប្បន្ន​មាន​វ័យ​៤៩​ឆ្នាំ និង អ្នកចម្រៀង Lisa Marie Presley ដែលជា​កូនស្រី​របស់​ស្តេច​ចម្រៀង Elvis Presley៕

ថ្មី​ៗ
អត្ថបទ : ធីតា