ព្រះវិហារ: នៅព្រឹកថ្ងៃទី១៩ ខែមករា ឆ្នាំ២០១៧ ថ្នាក់ដឹកនាំនិងមន្ត្រីអាជ្ញាធរជាតិព្រះវិហាររួមទាំងអាជ្ញាធរដែនដីមួយចំនួនទៀត បានបើកកិច្ចប្រជុំបូកសរុបលទ្ធផលការងារប្រចាំ២០១៦និងលើកទិសដៅបន្តឆ្នាំ២០១៧ដែលទីតាំងបើកកិច្ចប្រជុំនេះនៅទីបញ្ជាការដ្ឋានអង្គរក្សជួរមុខតំបន់ប្រាសាទព្រះវិហារ ស្ថិតនៅចំណុច៩៥ ភូមិធម្មជាតិសម្តេចតេជោឃុំស្រអែមស្រុកជាំក្សាន្ត។
សេចក្តីរាយការណ៍បានអោយដឹងថា កិច្ចប្រជុំនេះអង្គប្រជុំទាំងមូលបានឯកភាពសហការគ្នាដើម្បីទប់ស្កាត់ការកាប់បំផ្លាញព្រៃឈើក្នុងឧទ្យានប្រាសាទព្រះវិហារនិងការទន្ទ្រានដីព្រៃក្បែរតំបន់ប្រាសាទព្រះវិហារដើម្បីយកធ្វើជាកម្មសិទ្ធនិងការពារទប់ស្កាត់ដូចគ្នានៅឯរមណីយដ្ឋានប្រវត្តិសាស្ត្រប្រាសាទកោះកេរ្តិ៍ស្ថិតនៅឃុំស្រយង់ស្រុកគូលែនខេត្តព្រះវិហារ។
អាជ្ញាធរមូលដ្ឋានដែលបានចូលរួមប្រជុំខាងលើបានរាយការណ៍អោយដឹងថា អាជ្ញាធរជាតិព្រះវិហារបានលើកទ្បើងចំនួនភ្ញៀវទេសចរនៅឆ្នាំ២០១៦ ដែលបានចូលទៅទស្សនារមណីយដ្ឋានប្រវត្តិសាស្ត្រប្រាសាទព្រះវិហារមានចំនួនសរុប១០៦៨៤៥នាក់។
អាជ្ញាធរបានបន្តថា ភ្ញៀវជាតិមានចំនួន២៣៨២៣នាក់និងភ្ញៀវអន្តរជាតិមានចំនួន៨៣០២២នាក់ក្នុងនោះភ្ញៀវជនជាតិជប៉ុនឈរលេខរៀងទី១ភ្ញៀវចិនលេខរៀងទី២និងភ្ញៀវបារាំងឈរលេខរៀងទី៣។
ប្រភពព័ត៌មានបានអោយដឹងថា កន្លងមកតម្លៃសំបុត្រលក់អោយភ្ញៀវទេសចរបរទេសចូលទស្សនាប្រាសាទព្រះវិហារមានតម្លៃ១០ដុល្លារអាមេរិកក្នុងម្នាក់ៗប៉ុន្តែបច្ចុប្បន្ននេះមិនទាន់ដឹងថាអាជ្ញាធរជាតិព្រះវិហារសម្រេចតម្លើងថ្លៃសំបុត្រទស្សនាឬមួយយ៉ាងណានោះទេខណះសំបុត្រចូលទស្សនាប្រាសាទអង្គរវត្តនៅឯខេត្តសៀមរាបទ្បើងថ្លៃចំនួន៣៧ដុល្លារអាមេរិកសម្រាប់ខែកុម្ភះឆ្នាំ២០១៧នេះក្នុងភ្ញៀវបរទេសម្នាក់ៗ។
គួរបញ្ចាក់ថា កន្លងមកអាជ្ញាធរជាតិព្រះវិហារមិនបានយកចិត្តទុកដាក់ផ្តល់ការបំភ្លឺអំពីព័ត៌មានទាក់ទងទៅនឹងចំនួនភ្ញៀវទេសចរណ៍ចូលទៅទស្សនាប្រាសាទព្រះវិហារដល់អ្នកសារព័ត៌មានប្រចាំខេត្តព្រះវិហារអោយបានដឹងនោះទេ៕
CEN
ដោយ: អង្គរវត្ត
No comments:
Post a Comment