ភ្នំពេញ: បន្ទាប់ពីប៉ូលិសបានចាប់ខ្លួនអតីតតារាសំដែង ថៃ នរៈពិទូ និងបក្ខពួក ពាក់ព័ន្ធករណីគ្រឿងញៀន កាលពីពេលថ្មីៗកន្លងមកនេះនៅខេត្តបាត់ដំបង គឺសមត្ថកិច្ចបានរកឃើញថា ថៅកែក្លិបកំសាន្ត ស្តាឡៃយ៍ ដែលជាមន្ត្រីយោធា ផ្នែកសឹករងបាត់ដំបងក៏មានការពាក់ព័ន្ធទៅនឹងករណីចែកចាយគ្រឿងញៀនផងដែរ។
ការរកឃើញនេះ គឺបន្ទាប់ពីអតីតតារាសំដែង ថៃ នរៈពិទូ បានសារភាពការពិតប្រាប់ដល់សមត្ថកិច្ច។
ថៅកែក្លិបកំសាន្ត ស្តាឡៃយ៍ ក៏ជាប់សង្ស័យក្នុងការនាំយកពុម្ពផលិតថ្នាំញៀន អ៊ិច ស្តាស៊ី ចូលមកកាន់ទឹកដីខេត្តបាត់ដំបង។
តាមចំលើយសារភាពរបស់ឈ្មោះ ថៃ នរៈពិទូ គឺការផលិតថ្នាំញៀនលើកនេះ គឺគេអាចផលិតតាមបែបថ្មី ដោយ គេបានប្រើប្រាស់សារធាតុថ្នាំគ្រវី អ៊ីចស្តាស៊ី បូកផ្សំជាមួយនឹង សារធាតុកាហ្វេ ដែលជាសារធាតុថ្នាំដាស់អារម្មណ៍ ( សម្រើប ) ដើម្បីទទួលយកលទ្ធផល គឺអ្នកដែលលេបវាអាចសប្បាយ ជាមួយនឹងការគ្រវីផង ហើយក៏អាចមានអារម្មណ៍ខាងផ្លូវភេទផងដែរ។
ជុំវិញបញ្ហានៅក្នុងក្លឹបកំសាន្ត ស្តាឡៃយ៍ ដែលគេសង្ស័យថា ជាកន្លែងផ្តល់ទីតាំងអោយប្រើប្រាស់ផង និងជាទីកន្លែងចែក ចាយថ្នាំញៀនដ៏សកម្មផងនោះ ត្រូវបានកំលាំងជំនាញកំណត់ មុខសញ្ញាខ្លះៗហើយ ដោយរង់ចាំឱកាសចាត់វិធានការតាម ផ្លូវច្បាប់តែប៉ុណ្ណោះ។
សូមជម្រាបថា កាលពីថ្ងៃទី៩ ខែមករា ឆ្នាំ២០១៧ វេលា ម៉ោង ១១ និង១០ នាទីយប់ កំលាំងបង្កាបង្ក្រាប នៃស្នងការដ្ឋាននគរបាលខេត្តបាត់ដំបង ដឹកនាំដោយលោកឈឿង គឹមសុង បានសហការជាមួយនឹងកំលាំងជំនាញចុះប្រតិបត្តិ ការទៅកាន់ទីតាំងខារ៉ាអូខេមួយកន្លែង ដែលកំពុងប្រើប្រាស់ថ្នាំគ្រវីយ៉ាងពេញបន្ទុក គឺមានយីហោដឹសោន ហ្វាមីលី ខេធីវី ស្ថិតក្នុងភូមិកម្មករ សង្កាត់ស្វាយប៉ោ ក្រុងបាត់ដំបង ខេត្តបាត់ដំបង។
នៅក្នុងកិច្ចប្រតិបត្តិការនោះ សមត្ថកិច្ចបានធ្វើការឃាត់ខ្លួន មនុស្ស ៦ នាក់ ដែលក្នុងនោះមាននារីចំនួន២នាក់ ហើយ ម្ចាស់ទីតាំងនេះមានឈ្មោះ ហេង យូសុង ភេទប្រុស អាយុ២៤ឆ្នាំ រស់នៅភូមិ១៣មករា សង្កាត់ព្រែកព្រះស្តេច ក្រុងបាត់ដំបង និងម្នាក់ទៀតមានឈ្មោះ ថៃ នរៈពិទូ ភេទ ប្រុស អាយុ៣២ឆ្នាំ រស់នៅសង្កាត់អូរឫស្សី២ ខណ្ឌ៧មករា រាជធានីភ្នំពេញ ជាអតីតតារាសំដែង ។
នៅក្នុងពេលនោះ សមត្ថកិច្ចបានដកហូតនូវសារធាតុញៀន មួយចំនួន រួមទាំងពុម្ពសម្រាប់ផលិតថ្នាំញៀនប្រភេទ អ៊ិចស្តា ស៊ី ចំនួន២ និងបន្ទះថ្នាំសម្រាប់ផ្សំជាច្រើនបន្ទះដោយសារតែ ជនសង្ស័យឈ្មោះ ថៃ នរៈពិទូ នេះចេះវិធីលាយថ្នាំ និងផលិតថ្នាំផងដែរ ទើបបានជាគេនាំយកពុម្ពនេះមកកាន់ខេត្តបាត់ដំបង ដើម្បីផលិតចែកចាយ ។
ជុំវិញការសាកសួររបស់កំលាំងសមត្ថកិច្ចជំនាញ និងការស្រាវ ជ្រាវផងនោះ គេសង្គេតឃើញថា នៅមុនពេលប្រតិបត្តិការ របស់សមត្ថកិច្ច គឺមានវត្តមានរបស់ឈ្មោះ ជួន រដ្ឋា ហៅឡក់ ដែលជាថៅកែក្លឹបកំសាន្ត ស្តាឡៃយ៍ បានមកកាន់ទីតាំង ខាងលើនេះដែរ ដោយគេបានមកយកថ្នាំញៀនប្រភេទកាហ្វេ ពី ថៃ នរៈពិទូ យកទៅចែកចាយក្នុងក្លឹបកំសាន្តរបស់ខ្លួន ដោយក្នុងតំលៃក្នុងមួយកញ្ចប់ ចាប់ពី៧០ ដុល្លារ ដល់២៥០ ដុល្លារ ។
ប្រភពពីជំនាញមួយបានបង្ហើបអោយដឹងថា កាហ្វេ គឺជាប្រភេទថ្នាំម្យ៉ាង ដែលគេផ្សំឡើងដើម្បីពង្វក់អារម្មណ៍របស់ មនុស្សអោយត្រេកត្រអាល ពិសេសគឺខាងអារម្មណ៍ផ្លូវភេទទាំងប្រុស ទាំងស្រី នៅពេលដែលគេបានផឹកវាចូលទៅក្នុងពោះ គឺគេយកកាហ្វេ នេះ មកដាក់ចូលទៅក្នុងកែវមួយ ដោយលាយជាមួយទឹកក្តៅអ៊ុនៗ កូអោយរលាយហើយចាក់ ចែកគ្នាផឹកតែម្តង ដោយ១កញ្ចប់អាចលាយបាន៥កូនកែវ សិច សម្រាប់មនុស្ស៥នាក់ ។
រាល់បញ្ហាខាងលើនេះ គឺមានប្រភពជាច្រើនបានលើកឡើងថា ក្លឹបកំសាន្ត ស្តាឡៃយ៍ អាចជាប្រភពផ្តល់ទីតាំងសម្រាប់អ្នក លេងថ្នាំគ្រវី ( អ៊ិចស្តាស៊ី ) និងកាហ្វេ ផងដែរ ហើយក៏ជា ទីតាំងចែកចាយគ្រឿងញៀនដ៏ខ្លាំងក្លាដែរដែលបច្ចុប្បន្នទាំងសមត្ថកិច្ចនគរបាលជំនាញ ក៏ដូចជាកំលាំងកងរាជអាវុធហត្ថ កំពុងតែផ្តោតក្រសែភ្នែកយ៉ាងមុតបាញ់ឆ្ពោះទៅលើទីតាំងនេះដើម្បីច្បាមយកមុខសញ្ញាមកផ្តន្ទាទោសតាមផ្លូវច្បាប់ ព្រោះ រឿងរ៉ាវទាំងអស់នេះ កំពុងត្រូវបានបែកធ្លាយខ្លះៗហើយបន្ទាប់ ពីមានការខំប្រឹងប្រែងព្យាយាមបិទបាំងពីសំណាក់លោកថៅកែ ជួន រដ្ឋា ហៅឡក់ នេះ ។
CEN
ដោយ: មុនីរាជ
No comments:
Post a Comment