សៀមរាប: បើតាមសេចក្តីរាយការណ៍ បានអោយដឹងថា លោកឆាយ សុរិទ្ធិ រស់នៅស្រុកអង្គរជុំ ខេត្តសៀមរាប ជាឈ្មួញឈើដ៍ល្បីឈ្មោះម្នាក់ ប្រចាំតំបន់ស្រែណូយ កំពុងធ្វើសកម្មភាពដឹកជញ្ជូន ឈើអារលេខ១ និងលេខ២ គេចពន្ធប្រភេទឈើក្តារ និងផ្ទោង ដែលមានប្រភពប្រមូលមកពី តំបន់អូរក្រូច ស្រុកត្រពាំងប្រាសាទ ខេត្តឧត្តរមានជ័យ និងពីតំបន់អូរជុញ ស្រុកជាំក្សាន្ត ខេត្តព្រះវិហារ។
មតិមហាជននៅខេត្តសៀមរាប បាននាំគ្នានិយាយរិះគន់ថា បទល្មើសព្រៃឈើ មានដូចជាការដឹកជញ្ជូន ឈើគ្រញូង បេង ធ្នង់ នាងនួន ឈើអារលេខ១ លេខ២ គ្រឿងសង្ហារឹម ប្រណីតៗ និងគ្រឿងសិប្បកម្មឈើកែច្នៃ លុមៗ មិនអាចបង្ក្រាបទប់ស្កាត់ មានប្រសិទ្ធភាពនោះទេ បើសិនសមត្ថកិច្ចទាំងអស់ ដៃម្ខាងមិនបង្ក្រាប និងដៃម្ខាងទៀតសកម្ម ទទួលលុយសំណូក សូកប៉ាន់ពីក្រុមឈ្មួញឈើនោះ។
ឆ្មាំឃ្លាំមើលបទល្មើសព្រៃឈើ តាមដងផ្លូវជាតិលេខ៦៧ បានរាយការណ៍ អោយដឹងនៅព្រឹកថ្ងៃទី១៩ ខែមករា ឆ្នាំ២០១៧នេះថា ឈ្មួញឈើដុះស្លែ ឈ្មោះរិទ្ធ ម្នាក់នេះ រកស៊ីដឹកជញ្ជូនឈើគេចពន្ធ ប្រចាំខេត្តសៀមរាប ជិត២០ឆ្នាំមកហើយ មិនដែលឃើញមន្ត្រីរដ្ឋបាលព្រៃឈើ នៅតាមមូលដ្ឋាន ក៍ដូចជាមន្ត្រីបរិស្ថាន និងស្ថាប័នសមត្ថកិច្ច ពាក់ព័ន្ធផ្សេងទៀត ចុះចាប់បង្ក្រាបនោះទេ។
សមត្ថកិច្ចខ្លះ ពេលប្រជាពលរដ្ឋ រាយការណ៍អោយចាប់ឈើ គេចពន្ធដែលស្តុកទុក នៅស្រែណូយរបស់ឈ្មួញម្នាក់នេះ ត្រូវបានពួកគេឆ្លើយថា ជាប់រវល់ប្រជុំជាដើម។
ប្រភពព័ត៌មានបានបន្តថាលោកឆាយសុរិទ្ធិមានដេប៉ូឈើដ៍ធំមួយនៅទីរួមស្រុកអង្គរជុំខេត្តសៀមរាបនិងមានរថយន្តប្រព្រឹត្តបទល្មើសមួយគ្រឿងពណ៌ត្រេអ៊ីចំណុះ៥តោននិងគោយន្តកន្ត្រៃច្រើនគ្រឿងសម្រាប់ដឹកជញ្ជូនឈើខុសច្បាប់បន្តពីកន្លែងស្តុកទុកនៅស្រែណូយហើយដឹកបន្តបន្តទៅដាក់នៅដេប៉ូឈើរបស់ខ្លួននៅស្រុកអង្គរជុំថែមទៀត។
នាយរងអធិការដ្ឋាន រដ្ឋបាលព្រៃឈើ ខាងជើងបឹងទន្លេសាប លោកឯម មុន្នី បានមានប្រសាសន៍ថា ពាក់ព័ន្ធការដឹកឈើខុសច្បាប់ របស់ឈ្មួញឈ្មោះឆាយ សុរិទ្ធិ ចេញពីតំបន់អូរក្រូច ស្រុកត្រពាំងប្រាសាទ ខេត្តឧត្តរមានជ័យ យកទៅស្តុកទុកនៅតំបន់ស្រែណូយ លោកមិនបានដឹងនោះទេ។ លោកឯម មុន្នី បានអោយភ្នាក់ងារ គេហទំព័រ ស៊ីអ៊ីអិន (CEN) ប្រចាំខេត្តសៀមរាប ទាក់ទងទៅកាន់ប្រធានមន្ទីរកសិកម្ម រុក្ខាប្រមាញ់ និងនេសាទ ព្រោះឥទ្បូវ លោកស្ថិតនៅក្រោមការគ្រប់គ្រង របស់មន្ទីរកសិកម្ម បើសិនលោកប្រធានមន្ទីរកសិកម្ម បញ្ជាអោយចុះទៅពិនិត្យមើល បទល្មើសព្រៃឈើ នៅទីនោះគឺ លោកនឹងចុះទៅភ្លាម។
ប្រធានមន្ទីរកសិកម្ម រុក្ខាប្រមាញ់ និងនេសាទខេត្តសៀមរាប លោកទា គឹមសុទ្ធ បានមានប្រសាសន៍ថា លោកកំពុងជាប់រវល់ប្រជុំ ខណៈអ្នកសារព័ត៌មាន ទាក់ទងទៅគាត់ ដើម្បីសុំការបំភ្លឺថា តើលោកឆាយ សុរិទ្ធិ ពិតជាកំពុងរកស៊ីដឹកជញ្ជូន ឈើខុសច្បាប់ យកទៅស្តុកទុកនៅស្រែណូយ ឬមួយយ៉ាងណាទៅវិញ។
ប្រភពព័ត៌មានផ្សេងទៀត បានបង្ហើបអោយដឹងថា នៅតំបន់ស្រែណូយ មានឈ្មួញរកស៊ីដឹកឈើ អារគេចពន្ធខ្នាតធំម្នាក់ទៀត ឈ្មោះឆាយ ក៍មិនមានសមត្ថកិច្ចណា បង្ក្រាបដែរ ហើយមិនត្រឹមតែប៉ុណ្ណោះ ក៍មានការលូកដៃ លូកជើង ពីសមត្ថកិច្ចជើងខ្លាំង ចាប់ពីថ្នាក់ស្រុក ដល់ថ្នាក់ខេត្ត កាងបទល្មើសយ៉ាងរឹងមាំ នៅពីក្រោយខ្នង ឈ្មួញឈើដុះស្លែ ឈ្មោះឆាយ សុរិទ្ធិ និងឈ្មោះឆាយ ថែមទៀត។
លោកឆាយ សុរិទ្ធិ ធ្លាប់បានអះអាងប្រាប់អ្នកកាសែតថា គាត់ពិតជារកស៊ីដឹកជញ្ជូន ឈើអារលេខ១ និងលេខ២ គេចពន្ធ និងមានរថយន្តត្រេអ៊ី ចំណុះ៥តោន ចំនួន១គ្រឿង ប្រាកដមែន ប៉ុន្តែគាត់បានបដិសេធថា មិនបានដឹកឈើ យកទៅដាក់នឹងដេប៉ូឈើរបស់ខ្លួន នៅស្រុកអង្គរជុំនោះទេ គឺបានដឹកឈើទាំងអស់នោះ បង្ហួសយកទៅ លក់ នៅតាមដេប៉ូឈើ នៅឯខេត្តបន្ទាយមានជ័យ៕
CEN
ដោយ: យូហាក់
No comments:
Post a Comment