ភ្នំពេញ: លោកតុប សំ ប្រធានក្រុមប្រឹក្សាជាតិ ប្រឆាំងអំពើពុករលួយ បានវាយតម្លៃលើការងារប្រយុទ្ធប្រឆាំងអំពើពុករលួយក្នុងឆ្នាំ២០១៦នេះ ដែលបានឆ្លុះបញ្ចាំងឲ្យឃើញថា អង្គភាពប្រឆាំងអំពើពុករលួយ បាននិងកំពុងអនុវត្តន៍វិធានការអប់រំ បង្ការ ទប់ស្កាត់ មានលក្ខណៈល្អប្រសើរ មុននឹងធ្វើការបង្ក្រាប។
បើតាមសេចក្តីជូនដំណឹងស្តីពី កិច្ចប្រជុំលើកទី១៨អាណត្តិទី២ នៃក្រុមប្រឹក្សាជាតិ ប្រឆាំងអំពើពុករលួយ នៅថ្ងៃទី៣ខែមករាឆ្នាំ២០១៧ បានឲ្យដឹងថា ក្រុមប្រឹក្សាជាតិប្រឆាំងអំពើពុករលួយ បានវាយតម្លៃខ្ពស់លើសកម្មភាពការងាររបស់អង្គភាពប្រឆាំងអំពើពុករលួយ ក្នុងការនាំមុខ និងលើកទឹកចិត្ត ក្នុងវិស័យសាធារណៈ វិស័យឯកជន និងសង្គមស៊ីវិល ចូលរួមយ៉ាងផុសផុល ដែលធ្វើឲ្យមានការផ្លាស់ប្តូរ ប្រែប្រួលផ្នត់គំនិតក្នុងសង្គម។
លោកទេសរដ្ឋមន្ត្រី ឱម យ៉ិនទៀង ប្រធានអង្គភាពប្រឆាំងអំពើពុករលួយ បានមានប្រសាសន៍ថា លទ្ធផលការងារកិច្ចការគតិយុត្តិ ពាក្យបណ្តឹង និងអន្តរជាតិ រយៈពេល៣ឆ្នាំ ដោយពាក្យប្តឹងក្នុងឆ្នាំ២០១៤-២០១៦ មាន២៣៨៧ពាក្យប្តឹង ក្នុងនោះមាន ១១២៥ពាក្យប្តឹង ជាពាក្យប្តឹងអនាមិក (ឆ្នាំ២០១៤ មានពាក្យប្តឹងអនាមិក ៥២ភាគរយ ឆ្នាំ២០១៥មាន៤៦ភាគរយ និងឆ្នាំ២០១៦មាន៤២ភាគរយ) ពាក្យប្តឹងដែលទទួលបានច្រើនជាងគេគឺតាមរយៈប្រអប់ស។ ការកសាងលិខិតគតិយុត្តនៅក្នុងអង្គភាពក្នុងឆ្នាំ២០១៤-២០១៦ ចំនួន១៨២ ។ ការធ្វើលិខិតសុំការបំភ្លឺមានចំនួន២៣២១លិខិត ក្នុងឆ្នាំ២០១៤-២០១៦។ ចូលរួមស្តាប់សវនាការ របស់តុលាការ មានចំនួន៥៧ករណី(១១៣លើក) ជាការសន្និដ្ឋាន។ អំពើពុករលួយ ជាចំហរមានការថយចុះច្រើន អំពើពុករលួយ ក្នុងសេវាសាធារណៈ មានការថយចុះច្រើន មានបណ្តឹងថយចុះពី ១០០៩ ពាក្យប្តឹង ឆ្នាំ២០១៤ មក៥៧៥ពាក្យប្តឹង នៅឆ្នាំ២០១៦។
លោកទេសរដ្ឋមន្ត្រី បានលើកឡើងថា ពាក់ព័ន្ធទៅនឹងការស៊ើបអង្កេត លើករណីសង្កាត់ច្បារអំពៅ២ អង្គភាពប្រឆាំងអំពើពុករលួយ បានរាយការណ៍លទ្ធផល ជូនក្រុមប្រឹក្សាជាតិ ប្រឆាំងអំពើពុរលួយថា ក្រោយស្តាប់ចម្លើយរបស់ចៅសង្កាត់ និងក្រោយការផ្ទៀងផ្ទាត់ពីការស្តាប់ចម្លើយ២០នាក់ផ្សេងទៀត លោកយ៉ិន វុធ ចៅសង្កាត់ច្បារអំពៅ២ មិនមានប្រព្រឹត្តអំពើពុករលួយដូចការចោទប្រកាន់ទេ។ ទោះបីជាយ៉ាងណា ក្នុងសេចក្តីជូនដំណឹងនោះ អង្គភាពប្រឆាំងអំពើពុករលួយ មិនបានបញ្ជាក់អំពីការចាប់ខ្លួនជនល្មើស ដែលប្រព្រឹត្តអំពើពុករលួយប៉ុន្មាននាក់នោះទេ៕
CEN
ដោយ: ដាវុធ
No comments:
Post a Comment