ភ្នំពេញ៖ នៅឆ្នាំ២០១៦នេះ ក្រោយពីមានការចរចាប្រាក់បៀវត្សកម្មករយ៉ាងតានតឹងមក ប្រាក់ខែគោលរបស់កម្មករបានដំឡើងពី១៤០ ទៅ ១៥៣ ដុល្លារក្នុងមួយខែ នឹងចាប់ផ្ដើមអនុវត្តនៅដើមឆ្នាំ២០១៧ ខាងមុខនេះ។ ប៉ុន្តែ ការដំឡើងប្រាក់ឈ្នួលដល់កម្មករខ្លាំងពេក អាចធ្វើឲ្យបាត់បង់ និងថយចុះ ការបញ្ជាទិញពីបណ្ដាប្រទេសផ្សេងៗ ដែលធ្លាប់បញ្ជាទិញពីកម្ពុជាផងដែរ។
កំណើនប្រាក់បៀវត្សក្នុងវិស័យកាត់ដេរនៅកម្ពុជា មានការកើនឡើងជាលំដាប់ ដោយក្នុងឆ្នាំ២០១៦ ប្រាក់ខែគោលរបស់កម្មករ ទទួលបានត្រឹម ១៤០ ដុល្លារ តែឆ្នាំ ២០១៧ ខាងមុខ ប្រាក់ខែគោលនឹងកើនដល់ ១៥៣ ដុល្លារក្នុងមួយខែផងដែរ។ ដោយឡែក ការដំឡើងប្រាក់ខែដល់កម្មករជាបន្តបន្ទាប់បែបនេះ បានធ្វើឲ្យសមាគមរោងចក្រកាត់ដេរនៅកម្ពុជា មានការព្រួយបារម្ភ។
លោក ខេន លូ អគ្គលេខាធិការនៃសមាគមរោងចក្រកាត់ដេរនៅកម្ពុជា ហៅកាត់ថា ជីម៉ាក់ (GMAC) បានលើកឡើងបែបនេះថា៖«ការដំឡើងប្រាក់ខែដល់កម្មករខ្ពស់ពេក អាចមានការប៉ះពាល់ដល់វិនិយោគទុន ដោយសារតែផលិតភាពការងារមិនកើនឡើងដូចការដំឡើងប្រាក់ឈ្នួលរបស់ពួកគាត់»។
លោក ខេន លូ មានប្រសាសន៍ដូច្នេះថា៖ « នៅឆ្នាំ២០១៦ នេះ មានរោងចក្រប្រហែល ៨០ ដែលបានបិទទ្វារ ដោយខុសពីឆ្នាំ២០១៥ កន្លងទៅ មិនសូវមានរោងចក្របិទទ្វារនោះទេ»។ លោក បន្ថែមថា ការដំឡើងប្រាក់ខែដល់កម្មករខ្លាំងពេក ក៏ជាផ្នែកមួយនៃបញ្ហាសេដ្ឋកិច្ច ដែលបានបង្ខំឲ្យរោងចក្របិទទ្វារផងដែរ។
អគ្គលេខាធិការ GMAC រូបនេះ បញ្ជាក់ថា ក្នុងនាមជាតំណាងសមាគមរោងចក្រកាត់ដេរ ពិតជាមានផលលំបាក ដោយសារអ្នកបញ្ជាទិញមានការថយចុះ។ លោក ខេន លូ លើកឡើងថា៖ «កន្លែងណាមានកម្លាំងពលកម្មថោក គេទៅរកកន្លែងនោះហើយ ព្រោះប្រទេសផ្សេង មានកម្លាំងពលកម្មថោក ជាងប្រទេសកម្ពុជា»។
លោក ខេន លូ យល់ថា ការទាមទារដំឡើងប្រាក់ខែរបស់កម្មករ គឺជាការត្រឹមត្រូវ ព្រោះជាសិទ្ធិរបស់កម្មករ។ តែលោកចង់ឲ្យកម្មករបង្កើនផលិតភាពការងារកើនឡើងបន្ថែមទៀត។ លោក ខេន លូ ពន្យល់ថា កម្មករអាចនឹងមិនមានការងារធ្វើ ប្រសិនបើ ផលិតភាពការងារមិនកើនឡើង។
យ៉ាងណា លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករវិញបានលើកឡើងដូច្នេះថា៖«ផលិតភាពការងាររបស់កម្មករមិនកើនឡើង មិនមែនជាកំហុសរបស់កម្មករនោះទេ។ តែដោយសារមិនមានបច្ចេកទេសត្រឹមត្រូវ ដូចជាម៉ាស៊ីនចាស់ និងខូច ទើបផលិតភាពការងារមានការថយចុះ»។
លោក ប៉ាវ ស៊ីណា បញ្ជាក់ថា ទន្ទឹមនឹងការដំឡើងប្រាក់ខែដល់កម្មករបែបនេះ ក្រុមនិយោជកនៅតាមបណ្ដារោងចក្រមួយចំនួនក៏បានប្រឹងប្រែងជំរុញសង្វាក់ផលិតកម្មឡើងវិញផងដែរ។ លោក បន្តថា ក្រុមនិយោជក មានផែនការកំណត់ចំនួនមួយ និងបន្ថែមចំនួនមួយសម្រាប់កម្មករធ្វើការរាល់ថ្ងៃផងដែរ។
ប្រធានសម្ព័ន្ធសហជីពចលនាកម្មកររូបនេះ បានអះអាងថា កម្មករមិនមែនជាផ្នែកដែលធ្វើឲ្យរោងចក្របិទទ្វានោះទេ តែដោយសារបញ្ហាផ្ទៃក្នុងទើបរោងចក្រអាចបិទទ្វារ។ លោក បន្ថែមថា រោងចក្រដែលបិទទ្វារ គ្រាន់តែជារោងចក្រតូចតាចប៉ុណ្ណោះ តែសម្រាប់រោងចក្រធំៗវិញមិនបានបិទទ្វារនោះទេ។ លោក ប៉ាវ ស៊ីណា និយាយថា៖ «បើសិនជារោងចក្រមានជំនាញច្បាស់លាស់ នោះផលិតភាពការងារអាចនឹងកើនឡើងខ្ពស់»។
គួរបញ្ជាក់ផងដែរថា កំណើនប្រាក់ឈ្នួលក្នុងវិស័យកាត់ដេរនៅកម្ពុជា មានការកើនឡើងជាបន្តបន្ទាប់។ ដោយនៅមុនឆ្នាំ២០១៣ ប្រាក់ខែគោលរបស់កម្មករមានចំនួន ១០០ដុល្លារ តែឆ្នាំ២០១៤-២០១៥ ប្រាប់ខែគោលរបស់កម្មករបានតំឡើងបន្ថែមទៀតពី ១២៨ ដល់ ១៤០ដុល្លារ។ ក្រោយពីមានការចរចាក្នុង២០១៦ យ៉ាងតានតឹងអស់រយៈពេលជាយូរមក ប្រាក់ខែគោលរបស់កម្មករបានកើនពី ១៤០ ដល់ ១៥៣ ដុល្លារក្នុងមួយខែ នឹងចាប់ផ្ដើមអនុវត្តក្នុងឆ្នាំ២០១៧តទៅ៕
ថ្មីៗ
អត្ថបទ : ញឹក ស្រីល័ក្ខ
No comments:
Post a Comment