ភ្នំពេញ: ភាពមិនប្រក្រតីមួយចំនួន ដែលកើតមាន នៅក្នុងសាលាដំបូង រាជធានីភ្នំពេញ ក្រោមអាណត្តិគ្រប់គ្រង របស់លោក តាំង ស៊ុនឡាយ ប្រធានសាលាដំបូង រាជធានីភ្នំពេញ ត្រូវបានប្តឹងទៅអង្គភាព ប្រឆាំងអំពើពុករលួយ។ ដោយការប្តឹងនោះ គឺពាក់ព័ន្ធនឹងការបំពាន លើទ្រព្យសម្បត្តិ ដែលជាកម្មវត្ថុ នៃការចាប់យក និងការយកប្រាក់ពន្ធ លើសកំណត់ និងភាពមិនប្រក្រតីមួយចំនួន ពីសំណាក់លោកស្រី ដាន់ ចន្ទ្រាវតី មន្ត្រីទទួលបន្ទុកប្រមូលពន្ធ និងប្រាក់ពិន័យ នៃសាលាដំបូង រាជធានីភ្នំពេញ។
អង្គភាពប្រឆាំងអំពើពុករលួយ បានទទួលពាក្យបណ្តឹង ពាក់ព័ន្ធនឹងការបំពាន លើទ្រព្យសម្បត្តិ ដែលជាកម្មវត្ថុ នៃការចាប់យក និងការយកប្រាក់ ពន្ធលើសកំណត់ និងភាពមិនប្រក្រតីមួយចំនួន ពីសំណាក់លោកស្រី ដាន់ ចន្ទ្រាវតី មន្ត្រីទទួលបន្ទុកប្រមូលពន្ធ និងប្រាក់ពិន័យ នៃសាលាដំបូង រាជធានីភ្នំពេញ។ ពាក់ព័ន្ធនឹងភាពមិនប្រក្រតីនេះ លោកតាំង ស៊ុនឡាយ ប្រធានសាលាដំបូងរាជធានីភ្នំពេញ និងលោកស្រី ដាន់ ចន្ទ្រាវតី បានធ្វើការបំភ្លឺ និងបកស្រាយ ជូនអង្គភាពប្រឆាំងអំពើពុករលួយ។
លោកតាំង ស៊ុនឡាយ បានបំភ្លឺជូនអង្គភាព ប្រឆាំងអំពើពុករលួយថា លោកស្រី ដាន់ ចន្ទ្រាវតី ត្រូវការរថយន្ត សម្រាប់ដឹកជញ្ជូនប្រាក់ ពីធនាគារជាតិ មកសាលាដំបូង ឬពីសាលាដំបូង ទៅរតនាគារជាតិ ដើម្បីរក្សាសុវត្ថិភាព និងសន្តិសុខ សាលាដំបូង បានអនុញ្ញាត ផ្តល់រថយន្តម៉ាក តូយ៉ូតា កូរ៉ូឡា ពាក់ស្លាកលេខ ភ្នំពេញ 2Q-0011 តាមសំណើផ្ទាល់ខ្លួន របស់លោកស្រី។ រថយន្តនេះ ត្រូវបានរឹបអូស ជាសម្បត្តិរដ្ឋ។
សាលាដំបូងរាជធានីភ្នំពេញ បានអនុញ្ញាតឲ្យ មន្ត្រីលេខាធិការដ្ឋាន ប្រើប្រាស់រថយន្ត ចំនួន២គ្រឿង រួមមានមួយគ្រឿង ប្រគល់ជូនលោកស្រី ដាន់ ចន្ទ្រាវតី និងមួយគ្រឿងទៀត ទុកសម្រាប់លេខាធិការដ្ឋាន ប្រើប្រាស់ជញ្ជូនសំណុំរឿងផ្សេងៗ ទៅសាលាឧទ្ធរណ៍ តុលាការកំពូល ឧត្តមក្រុមប្រឹក្សា នៃអង្គចៅក្រម និងក្រសួងយុត្តិធម៌។ ក្រៅពីនេះ មានអង្គភាព និងស្ថាប័នជាច្រើន បានខ្ចីរថយន្តយកទៅប្រើប្រាស់ ហើយរថយន្តទាំងនោះ គឺជាវត្ថុតាង ដែលជាកម្មវត្ថុ នៃការរឹបអូស។
ប្រធានសាលាដំបូង រាជធានីភ្នំពេញ បានបញ្ជាក់ថា បច្ចុប្បន្ន សាលាដំបូង បាននឹងកំពុងចាត់វិធានការ ប្រមូលស្ថិតិរថយន្ត និងម៉ូតូទាំងអស់ ដើម្បីគ្រប់គ្រង ឲ្យបានត្រឹមត្រូវ។ ពាក់ព័ន្ធនឹងការយកប្រាក់ លើសកំណត់ សាលាដំបូង ធ្លាប់បានកោះហៅ និងប្រជុំផ្ទៃក្នុង ដើម្បីបញ្ចៀសការយកពន្ធ លើសបង្កាន់ដៃ ម្តងជាពីរដង រួចមកហើយ។
ពាក់ព័ន្ធនឹងការយកប្រាក់ ពន្ធលើសពីបង្កាន់ដៃ ដោយយកលេសថា គ្មានលុយអាប់ លោកស្រី ដាន់ ចន្ទ្រាវតី បានបំភ្លឺថា គាត់ទទួលតួនាទី ប្រមូលពន្ធ និងប្រាក់ពិន័យ ពីថ្ងៃទី២៣ ខែមិថុនា ឆ្នាំ២០១៥ រហូតមកដល់ពេលនេះ មានរយៈពេលជាង ១ ឆ្នាំហើយ។ ករណីតិចតួច ដែលខ្វះខាតភាគច្រើន ជាមេធាវី ដែលគាត់មិនព្រម ទទួលលុយអាប់ ៣.០០០ រៀល ឬ ៥.០០០ រៀល ដែលយឺតយ៉ាវ ក្នុងការរកលុយអាប់ ដូចជា ពាក្យសុំ១ច្បាប់ ត្រូវបង់ប្រាក់ ចំនួន ៥.០០០ រៀល ប៉ុន្តែគាត់បានឲ្យប្រាក់ចំនួន ២ ដុល្លារ ឬ ១០.០០០ រៀល ដែលត្រូវរកលុយអាប់ ជូនពួកគាត់ ហើយពួកគាត់ មិនព្រមចាំយក...៕
CEN
ដោយ: មុនីរាជ
No comments:
Post a Comment