ភ្នំពេញ: នៅព្រឹកថ្ងៃទី២១ ខែធ្នូនេះកម្លាំងសមត្ថកិច្ចចម្រុះ រួមមានគយ កាំកុងត្រូល កម្លាំងរដ្ឋបាលព្រៃឈើ កម្លាំងអាវុធហត្ថ អាជ្ញាធរដែនដី បានធ្វើការគាស់ឈើហ៊ុប ដែលឈ្មួញ បានបង្កប់ ភ្លុកដំរីឆ្អឹងខ្លា ស្រការពង្រួល និងកន្ទុយដំរី ដែលដាក់តាមទូកុងតឺន័ររថភ្លើង ក្នុងក្រុមហ៊ុន អាយស្ម័យយានរ៉ូយ៉ាល់ផែស្ងួតភ្នំពេញ ។ជាលទ្ធផល បានរកឃើញភ្លុកដំរី ចំនួន៦៤០ដុំ ស្មើរនឹងទម្ងន់ ១,៣៦១.៩គីឡូក្រាម ស្រការពង្រួល ទម្ងន់១៣៧.៦គីឡូក្រាម ឆ្អឹងខ្លា ទម្ងន់៨២.៣គីឡូក្រាម និងកន្ទុយដំរី ទម្ងន់៤.៩គីឡូក្រាម សរុបទាំងអស់ទម្ងន់១,៥៨៦.៧គីឡូក្រាម។
សូមបញ្ជាក់ថាកាលពីរសៀលថ្ងៃទី១៧ ខែធ្នូឆ្នាំ២០១៦ កម្លាំងសមត្ថកិច្ចចម្រុះ បានធ្វើការបង្ក្រាប ភ្លុកដំរីឆ្អឹងខ្លា ស្រការពង្រួល និងកន្ទុយដំរី ដែលឈ្មួញបង្កប់នៅក្នុងឈើហ៊ុប បម្រុងនាំចេញទៅកាន់ប្រទេសចិន ប្រមាណ៣ដុំ នៅក្នុងចំណុចក្រុមហ៊ុន «អយស្ម័យយានរ៉ូយ៉ាល់ផែស្ងួតភ្នំពេញ» ដែលមានទីតាំងនៅតាមបណ្តោយផ្លូវបេតុង ភូមិត្រពាំងក្រសាំង សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ។
ករណីនេះ គឺខាងកម្លាំងគយ ជាអ្នកម្ចាស់ករណី ដោយមានការសហការណ៍ពីកម្លាំងសមត្ថកិច្ចរដ្ឋបាលព្រៃឈើ និងអង្គការ «វ៉ាយ អេត» តំណាងស្ថានទូតអាមេរិកកាំង កម្លាំងកាំកុងត្រូល អាវុធហត្ថលើផ្ទៃប្រទេស អាជ្ញាធរមូលដ្ឋាន ធ្វើការបង្ក្រាបបាន ភ្លុកដំរី ឆ្អឹងខ្លា ស្រការពង្រួល និងកន្ទុយដំរី ដែលឈ្មួញបង្កប់នៅក្នុងឈើហ៊ុបបម្រុងនាំទៅកាន់ប្រទេសចិន ប្រមាណ៣ដុំ។
ភ្លុកដំរី ឆ្អឹងខ្លា ស្រការពង្រួល និងកន្ទុយដំរីទាំងនេះ ត្រូវបានជនល្មើស លួចបង្កប់នៅក្នុងឈើហ៊ុប ចំនួន៣ដុំ ដោយឈើហ៊ុប នីមួយៗ ដែលបង្កប់វត្ថុតាងទាំងនេះ មានមុខកាត់ កន្លះម៉ែត្រ បួនជ្រុង និងមានប្រវែងពី ២ ម៉ែត្រ ទៅ៣ម៉ែត្រ ហើយត្រូវបានឈ្មួញចុះរន្ធឈើចំពាក់កណ្តាលបង្កប់នៅក្នុងនោះ ដោយមានចាក់ទៀនផ្សារភ្ជាប់ ដែលមានសណ្ថានដូចក្តារម្ឈូស៕
CEN
ដោយ: សំណាង
No comments:
Post a Comment