ភ្នំពេញ: លោករដ្ឋមន្ត្រីក្រសួងព័ត៌មាន បានស្នើឲ្យនិពន្ធនាយកនៃសារព័ត៌មាន ទូទាំងព្រះរាជាណាចក្រកម្ពុជា ត្រូវគិតគូរឡើងវិញមុននឹងការចេញផ្សាយនូវទំព័រមុខរបស់កាសែត ដោយលោកសង្ឃឹមថា នឹងមិនមានរូបភាពអាក្រក់ រឿងអាក្រក់ទៀត ហើយនឹងមានតែអ្នកធ្វើល្អៗជំនួសវិញ។
ថ្លែងក្នុងវេទិកានិពន្ធនាយកសារព័ត៌មានកម្ពុជា កាលពីរសៀលថ្ងៃទី២៦ ខែធ្នូ ឆ្នាំ២០១៦ នៅសណ្ឋាគារសុខាភ្នំពេញ លោកខៀវ កាញារីទ្ធ រដ្ឋមន្ត្រីក្រសួងព័ត៌មាន បានបញ្ជាក់ថា ការផ្លាស់ប្តូរពីអ្វីៗ ដែលអាក្រក់មកជារឿងល្អនៅទំព័រមុខកាសែតនោះ មិនមែនទំព័រមុខ សម្រាប់តែជនអាក្រក់នោះទេ។
លោកបានបន្តថា អ្នកកាសែតទាំងអស់ ត្រូវតែសរសេរវិភាគឲ្យបានស៊ីជម្រៅ ដើម្បីផ្តល់ទៅអ្នកអាន ឲ្យស្របតាមការវិវឌ្ឍន៍សង្គម ដែលត្រូវផ្តល់ដល់មហាជន រដ្ឋាភិបាល មន្ត្រីជាការផ្តល់គំនិត ជាយោបល់ ដើម្បីជំរុញឲ្យមាន អ្នកអានវិភាគបានច្រើន។
ជាមួយគ្នានោះដែរ លោកប៉ែន បូណា ប្រធានក្លិបអ្នកកាសែតកម្ពុជា បានលើកឡើងថា វេទិកានិពន្ធនាយក ដែលធ្វើឡើងនាពេលនេះ ក្នុងបំណងពង្រឹងក្រមសីលធម៌ និងវិជ្ជាជីវៈ របស់អ្នកសារព័ត៌មានបន្ថែមទៀត នៅក្នុងសម័យកាលសារព័ត៌មានបែបថ្មី ដែលមានល្បឿនលឿន និងបានដល់មនុស្សជាច្រើន នៅគ្រប់ទីកន្លែង បានប្រើប្រាស់បណ្តាញព័ត៌មានសង្គម តាមរយៈមធ្យោបាយផ្សេងៗ។
លោក ប៉ែន បូណា ក៏បានអំពាវនាវដល់ ម្ចាស់សារព័ត៌មាន និងស្ថាប័នពាក់ព័ន្ធ សហការបង្កើតក្រមសីលធម៌ សម្រាប់យកអនុវត្តន៍ ក្នុងការប្រើប្រាស់ បណ្តាញព័ត៌មានសង្គម ឲ្យបានត្រឹមត្រូវ ប្រកបដោយសុខុដុមនីយកម្មសង្គម និងការអភិវឌ្ឍ ដោយចៀសវាងបាន នូវការបែកបាក់ និងជម្លោះផ្សេងៗ ក្នុងសង្គម ដោយសារតែសារព័ត៌មាន។
លោក បានបន្តថា សាធារណជន ពិសេសអ្នកដែលអះអាងថា ខ្លួនជាអ្នកសារព័ត៌មានពលរដ្ឋ ដែលប្រើប្រាស់បណ្តាញព័ត៌មានសង្គម ត្រូវជួយលើកស្ទួយវប្បធម៌ និងប្រពៃណីជាតិ ព្រមទាំងសេចក្តីថ្លៃថ្នូរ និងសិទ្ធិបុគ្គល គ្រួសារ សហគមន៍ និងស្ថាប័ន នៅលើបណ្តាញព័ត៌មានសង្គម ដើម្បីកុំឲ្យមានទោសទណ្ឌ ក្នុងការប្រើប្រាស់ បណ្តាញព័ត៌មានសង្គម ខុសពីក្របខ័ណ្ឌច្បាប់ របស់ប្រទេស។ អ្នកសារព័ត៌មាន មិនត្រូវសរសេរនូវសារ អត្ថបទ និងរូបភាព ដែលមានលក្ខណៈ បែបញុះញង់ បញ្ឆេះកំហឹង អុជអាល ដែលនាំឲ្យមានជម្លោះកាន់តែធំ គ្មានប្រភពច្បាស់លាស់ ឬប្រភពអនាមិក នាំឲ្យមានការចលាចល ដល់សង្គម៕
CEN
ដោយ: ដាវុធ
No comments:
Post a Comment